जनकपुरः प्रदेश २ को सरकारले मधेस आन्दोलनका घाइतेहरुलाई आर्थिक सहयोग गर्ने निर्णय गरेको छ । सोमबार साँझ बसेको मन्त्रिपरिषदको बैठकले मधेस आन्दोलनमा घाइते भएकाहरुलाई आर्थिक सहयोग गर्ने निर्णय गरेको हो ।
गम्भीर प्रकृतिका घाइतेहरुलाई बढीमा तीन लाख रुपैयाँ दिने निर्णय गरिएको मुख्यमन्त्री लालबाबु राउतले जनाए । उनका अनुसार त्यसपछि क्रमश घाइतेको अवस्था अनुसार क्रमश डेढ लाख र कम्तीमा १ लाखसम्म रुपैयाँ तत्कालका लागि दिने निर्णय गरिएको छ ।
आन्दोलनका घाइतेहरुको अवस्था र प्रकृति हेरेर आर्थिक सहयोग गर्ने नीति लिइएको सरकारका प्रवक्ता एवम अर्थमन्त्री विजय यादवले जानकारी दिए ।
उनका अनुसार अपाङ्ग भएका घाइते, सख्त र सामान्य घाइते गरी तीन समुह बनाइन्छ । मापदण्ड अनुसार अपाङ भएका घाइतेलाई ३ लाख दिइने निर्णय गरिएको सरकारका प्रवक्ता यादवले जनाए । घाइतेहरुको वास्तविक तथ्यांक नभए पनि संकलन गरेर बाँडने सरकारले तयारी गरेको अर्थमन्त्री यादवले बताए ।
यसैगरी सोमबारै बसेको मन्त्रिपरिषदको बैठकले बिद्याधर मलिकको अध्यक्षतामा प्रदेशको प्रशासनिक संरचना सुधार सुझाव समिति गठन गरेको छ । मुख्यमन्त्री तथा मन्त्रिपरिषदको कार्यालयका सचिवको संयोजकत्वमा समिति गठन गरिएको हो । जसमा सबै मन्त्रालयका सचिवहरुलाई पदेन सदस्य राखिएको छ ।
त्यसैगरी बैठकले मुख्य न्यायधिबक्ताको कार्यालयबाट प्राप्त कानुनी सहायता अधिकृतको नियुक्ति तथा सेवा सर्त सम्बन्धि निर्देशिका २०७५ लाई समेत स्वीकृति प्रदान गरेको छ ।
प्रतिक्रिया दिनुहोस !
