दोलखा : गिटी बालुवा अभावको विरोधमा नेपाल तरुण दल दोलखाले सदरमुकाम चरिकोटमा एक घण्टा चक्काजाम गरेको छ।बालुवा गिटीको सहज आपूर्तिका लागि जिल्ला समन्वय समिति, प्रमुख जिल्ला अधिकारीलगायतलाई दबाब दिन तरुण दल दोलखाले मंगलबार सदरमुकाम चरिकोटमा एकघण्टा चक्का जाम गरेको हो।
'बालुवा गिटीसहितका निर्माण सामग्री अभावका कारण दोलखा जिल्लाका भूकम्प पीडितलाई पर्न गएको असुविधाको विरोधमा चक्का जाम गरिएको हो,' तरुण दल दोलखाका अध्यक्ष दावासाङ्गे शेर्पाले भने।
तरुण दलले मंगलबार बिहान ११ बजेदेखि १२ बजेसम्म सदरमुकाम चरिकोटको सातदोबाटोमा एक घण्टा चक्का जाम गरेको छ। अध्यक्ष शेर्पाले चाँढोभन्दा चाँढो भुकम्प पीडितलाई महशुस हुनेगरी बालुका गिटीको आपूर्तिको व्यवस्था नमिलाए जस्तोसुकै आन्दोलन पनि गर्ने बताए।
उता प्रशासनले भने आइतबार सो विषयमा छलफल गर्ने भनिएको भए पनि ३ दिनसम्म कुनै चासो नदिएको कारण चक्काजाम गर्न बाध्य हुनुपरेको अध्यक्ष शेर्पाको भनाई छ।
राष्ट्रिय पुर्ननिर्माण प्राधिकरण दोलखाका कार्यालय प्रमुख निर्मलदर्शन आचार्यको अनुसार जेठ मसान्तसम्म दोलखाको नीजि आवास पुर्ननिर्माणको काम ४४ प्रतिशत मात्र भएको छ। जिल्लामा अझै ५६ प्रतिशत निजी आवास पुर्ननिर्माणको काम भने बाँकी छ।
प्रतिक्रिया दिनुहोस !
