प्युठान : प्युठानका ग्रामीण क्षेत्र जोड्ने सडक निर्माण भएपछि गाउँको उत्पादन सहर पठाउन किसानलाई सहज भएको छ । कच्ची सडक हिउँदमा मात्रै सञ्चालन हुँदै आएका थिए । तर, अहिले घरअगाडिकै सडक कालोपत्रे हुँदा स्थानीय हर्षित भएका छन् ।
मुख्य सडकबाहेक जिल्लाका भित्री सडक कालोपत्रे भएका थिएनन् । खलंगा–चुँजाठाटी–जोगिटारी सडकअन्तर्गत पहिलो चरणमा १३ किलोमिटर र दोस्रो चरणमा ६ किलोमिटर सडक कालोपत्रे गर्र्ने काम भइरहेको छ ।
सालठाँटीको सिमलटारी र जोगिटारी बीचमा काम भइरहेको छ । बर्खामा दुःख पाएका सदरमुकाम खलंगासहित व्यापारिक केन्द्र विजुवार पुग्ने स्थानीय यसपालि हौसिएका हुन् । ‘हिलो र धुलोले यात्रा गर्न धेरै कठिन थियो’, ऐरावती गाउँपालिका–६ हाँडीखोलाका स्थानीय रामप्रसाद पोखरेलले भने, ‘सडक कालोपत्रे भएको देख्दा खुसी लागेको छ ।’
कालोपत्रे सडकले मल्लरानी गाउँपालिकामा पर्ने खलंगा, चुँजाठाटी, धरमपानी, बिजुली, रस्पुरकोट र ऐरावती गाउँपालिकासहित अर्घाखाँचीका नागरिक प्रत्यक्ष लाभान्वित भएका छन् । पवित्र धार्मिक एवं पर्यटकीय तीर्थस्थल स्वर्गद्वारी र अर्घाखाँचीको सुपादेउराली दर्शन गर्ने तीर्थालुहरू यसै सडक भएर ओहोरदोहोर गर्छन् । जोगिटारीको खोलामा पक्कीपुल बनेपछि वर्षभरि नै यातायात चल्नेमा स्थानीय अझ ढुक्क छन् । निर्माण कम्पनीले निर्धारित समयमा लक्ष्यअनुसार भने सडक कालोपत्रे नगरेको पोखरेलले जानकारी गराए । बाटो राम्रो भएपछि खेतीपाती गर्ने हौसला बढेको बिजुलीका स्थानीय किसान डोरबहादुर खड्काले बताए । ‘वर्षौंदेखि व्यवसायिक रूपमा कागती खेती गरिरहेको छु’, उनले भने, ‘बजार लैजान सजिलो हुने भयो ।’
राष्ट्रिय ग्रामीण यातायात सुदृढीकरण परियोजना (एसएनआरटीपी)ले विश्व बैंक र नेपाल सरकारको सहयोगमा सडक (वटासिल) कालोपत्रे गर्न थालेको हो । प्राथमिकतामा परेका जिल्लाका चार सडकअन्तर्गत उक्त सडक वटासिल गरिएको जिल्ला प्राविधिक कार्यालयका निमित्त प्रमुख जिल्ला इन्जिनियर चन्द्रबहादुर शाहले जानकारी दिए । दुई खण्डमा विभाजन गरेर काम थालिएको उनले बताए । हालसम्म तीन किलोमिटर बढी सडक वटासिल भइसकेको उनको भनाइ छ ।
‘५० प्रतिशत वित्तीय र ७० प्रतिशत भौतिक प्रगति भइसकेको छ’, शाहले भने, ‘लक्ष्यअनुसार यसवर्ष सबै काम हुन सकेन । अर्को वर्ष पूरा गर्छौं ।’ खलंगादेखि जोगिटारीसम्म १९ किलोमिटर वटासिल गर्ने योजना रहेको उनले बताए । मौसम अनुकूल भए चालु आर्थिक वर्षसम्म करिब १० किलोमिटर सकड वटासिल गर्ने योजना रहेको उनले उल्लेख गरे । वटासिल सडकका लागि झण्डै १७ करोड ९९ लाख रुपैयाँ बजेट विनियोजन भएको छ । सडक क्षेत्रमा पर्ने ९७ जग्गाधनीलाई प्रतिव्यक्ति पा“च हजार रुपैयाँका दरले रकम दिएको छ । मल्लरानी गाउँपालिकाको बञ्चरेस्थित ६ सय मिटरमा घरहरू रहेको क्षेत्रबाहेक अन्यत्र सबै स्थानमा सडक चौडा बनाइएको छ ।
लोहनी एन्ड ब्रर्दश काठमाडांैले ठेक्कामार्फत निर्माणको जिम्मा लिएको छ । ०७२ असोज २७ गते कम्पनीले निर्माणको ठेक्का सम्झौता गरेको थियो । तर, निर्धारित समयमा काम पूरा नगरेपछि स्थानीय निराश भएका थिए । हाल निर्माणले गति लिएपछि नागरिक खुसी छन् । मधेश आन्दोलन, नाकाबन्दी, प्रदेश आन्दोलन, समन्वय समितिले निर्धारित समयमा काम गर्ने क्षेत्र निर्धारण नगर्दा निर्माणमा ढिलाइ भएको ठेकेदार कम्पनीले जनाएको छ । निर्माण कम्पनीले चुजाठाँटीमा कार्यालय खोलेर दुई प्याकेजमा काम गरिरहेको छ ।
प्रतिक्रिया दिनुहोस !
