काठमाडौं : मोरङ र ब्रिगेड ब्वाइज क्लब ललित स्मृति यू-१८ फुटबल प्रतियोगिताको सेमिफाइनलमा प्रवेश गरेका छन् । सातदोबाटोस्थित एन्फा कम्प्लेक्समा आइतबार भएको पहिलो क्वार्टरफाइनलमा च्यासल युवा क्लबलाई २-१ ले पराजित गर्दै मोरङले सेमिफाइनलमा स्थान बनाएको हो ।
मोरङको जितमा आशिष चौधरी नायक बने । उनले खेलको ७३ र ८१औं मिनेटमा गोल गर्दै मोरङलाई सेमिफाइनलमा पुर्याए । च्यासलका रोशन भुजेलले खेलको ८९औं सान्त्वना गोल फर्काए ।
यसैगरी आइतबार नै भएको अर्को खेलमा ब्रिगेड ब्वाइज क्लबले झापा-११ लाई २-१ गोलले नै पराजित गर्दै सेमिफाइनलमा स्थान बनायो । झापाले खेल सुरु भएको सातौं मिनेटमै सुरुवाती अग्रता बनाए पनि त्यसलाई बचाउन नसक्दा पराजय बेहोर्न बाध्य भयो । झापाका लागि डोजाङ लिङदेनले पहिलो गोल गरेका थिए । ब्रिगेड ब्वाइजका रजत तिवारीले १४औं मिनेटमा गोल गर्दै खेल बराबरी ल्याएका थिए । उनले नै दोस्रो हाफको ६८औं मिनेटमा व्यक्तिगत दोस्रो गोल गरेपछि ब्रिगेड ब्वाइजले सेमिफाइनलमा स्थान बनायो ।
अखिल नेपाल फुटबल संघ (एन्फा) का स्वर्गीय कार्यवाहक अध्यक्ष ललितकृष्ण श्रेष्ठको स्मृतिमा आयोजित प्रतियोगितामा १८ टोलीको सहभागिता रहेको छ । लिगकम नकआउटका आधारमा खेलाइएको प्रतियोगितामा सहभागी टोलीलाई चार समूहमा विभाजन गरिएको छ । प्रतियोगिताको विजेता टोलीले तीन लाख र उपविजेता टोलीले एक लाख ५० हजार रुपैयाँ पुरस्कार पाउनेछन् । विधागत रूपमा उत्कृष्ट हुने खेलाडीले जनही १० हजार रुपैयाँ पाउनेछन् । एन्फाले आगामी एएफसी यू-१९ च्याम्पियनसिप छनोट खेलका लागि खेलाडी तयार गर्ने उद्देश्यले प्रतियोगिता आयोजना गरेको हो ।
प्रतिक्रिया दिनुहोस !
