विराटनगरः पूर्व–पश्चिम राजमार्ग अन्तर्गत मोरङको बेलबारी नगरपालिका १० लक्ष्मीमार्गमा जंगली हात्तीको आक्रमणबाट सोमबार विहान एक सडक मजदुरको मृत्यु भएको छ । राजमार्ग मर्मत र सरसफाइमा खटिएका मजदुर मोरङको जहदा गाउँपालिका–४ का ५५ वर्षीय रघु महतोको हात्तीको आक्रमणबाट मृत्यु भएको मोरङ प्रहरीका प्रवक्ता डिएसपी निशान थापाले बताए ।
थापाका अनुसार सडक छेउमै त्रिपाल टाँगेर बनाइएको टेन्ट भित्र सुतिरहेको अवस्थामा जंगलबाट निस्किएको हात्तीले विहान २ बजे आक्रमण गरेको थियो । उनको घटनास्थलमै मृत्यु भएको हो । उनी लामो समयदेखि सडक मर्मत र सरसफाइको काम गर्दै आएका मजदुर भएको प्रहरीले जनाएको छ ।
महतोसँगै सुतेका अन्य दुई भने हात्ती आएको थाहा पाउन साथ भागेर ज्यान बचाउन सफल भएको डिएसपी थापाले बताए । महतो पनि ज्यान जोगाउन भाग्न खोज्दै गर्दा हात्तीको आक्रमणमा परेको जानकारी उनले दिए । मजदुरले सडक छेउमा त्रिपाल टाँगेर बनाएको टेन्ट पनि हात्तीले भत्काइदिएको छ । उनीहरुले त्यहाँ भित्र राखेका खानेकुरा पनि खाइदिएको छ ।
घटनापछि हात्ती उत्तरतर्फको जंगलतिर लागेको प्रहरीले जनाएको छ । घटना लगत्तै स्थानीय बासिन्दा होहल्ला गरेर निस्कन थालेपछि हात्ती उत्तरतर्फ लागेको हो । महतोको शव पोष्टमार्टमका लागि मोरङको उर्लाबारी स्थित मंगलबारे अस्पतालमा लगिएको छ ।
प्रतिक्रिया दिनुहोस !
