काठमाडौँ: गायिका लक्ष्मी हमालको ‘के हुँदैछ आजभोलि’ बोलको गीत भिडियोसहित आएको छ । लक्ष्मीकै शब्दमा सञ्जय हमालको सङ्गीत रहेको गीतको भिडियोलाई र्याप गायक निर्णय श्रेष्ठले निर्देशन गरेका हुन् ।
भिडियोमा अभिलाषा शर्माले मोडलिङ गरेकी छन् । राजधानीमा सोमबार आयोजित कार्यक्रममा सङ्गीतकार टीका भण्डारीले एक कार्यक्रमबिच गीत एवम् भिडियो सार्वजनिक गरेका हुन् । ‘लक्ष्मी हमाल साङ्गीतिक पारिवारिक माहौलबाट आएकाले गीत सङ्गीतमा उहाँको भविष्य उञ्जवल छ’, भण्डारीले भने ।
कार्यक्रममा प्रस्तोता समाज नेपालका पूर्वअध्यक्ष हेमन्त शर्माले जीवन अपूर्ण र सिकाइको सार भएकाले एउटै गीत सुनेर वा हेरेर गायक तथा गायिकाको मूल्याङ्कन गर्न नसिकिने बताए ।
‘लक्ष्मी हमालको स्वर मिठो छ, आजमात्रै उहाँको गीत सुनेँ’, भिडियो पनि राम्रो लाग्यो’, शर्माले भने । गीत ‘के हुँदैछ आजभोली’ का सङ्गीतकार तथा एरेन्जर सञ्जय हमालले नेपाली गीत–सङ्गीतलाई बचाई राख्न आफू निरन्तर लागिरहेको बताए ।
प्रतिक्रिया दिनुहोस !
