‘कपडा बाँडेर बजेट पारित’
जनकपुरधाम : आर्थिक अनियमितता लुकाउन धनुषाको जनकपुर उपमहानगरपालिकाका मेयरले जनप्रतिनिधिलाई प्रभावमा पारेर बजेट पारित गराएको आरोप लागेको छ । जनकपुरका मेयर लालकिशोर साहले जनप्रतिनिधिलाई प्रभावमा पारेर बजेट पारित गराएको आरोप वडाध्यक्षले लगाएका हुन् ।
अनियमिततालाई लिएर बजेट ल्याउन नदिने सम्भावना देखेपछि वडासदस्यलाई कपडासहित रकमसमेत बाँडिएको उनीहरूको दाबी छ । असार ९ गते उद्घाटन भएको उपमहानगरपालिकाको नगरसभामा २५ वडाका १ सय वडासदस्यलाई कपडा र रकम बाँडिएको जनकपुर–९ का वडाध्यक्ष परमेश्वर साहले बताए । महिला सदस्यलाई साडी र पुरुषलाई कुर्ता, पाइजामाका कपडासहित जनही ७ हजार रुपैयाँ बाँडेर बजेट पारित गराउन बहुमत जुटाइएको दाबी उनले गरे ।
विभिन्न वडाबाट बजेटको विरोध हुन सक्ने भएकाले मेयरले वडासदस्यलाई प्रभावमा पारेको एक वडाध्यक्षले बताए । कुल विकास बजेट ७० करोड मध्ये १२ करोड ७५ लाख मात्रै वडालाई र बाँकी रकम मेयर र उपमेयरले आफूमातहत खर्च गर्ने गरी विनियोजन गरेको वडाध्यक्षको आरोप छ ।
चालू बजेटमा जानकी मन्दिरको सौन्दर्यीकरण, फोहोर व्यवस्थापन, लामखुट्टे नियन्त्रण, मिथिला पेन्टिङ, वडा कार्यालयका लागि कम्प्युटर खरिद, सहिद स्मारक निर्माण, सडक बत्तीलगायत शीर्षकमा १ करोडभन्दा बढी रकम अनियमितता भएको दाबी उनीहरूले गरेका छन् ।
उपमेयर रीताकुमारी मि श्रले वडासदस्यलाई पोसाकका लागि निर्णय गरेरै कपडा उपलब्ध गराइएको बताइन् । ‘स्थानीय तहका जनप्रतिनिधिलाई औपचारिक पोसाक लगाउने व्यवस्था भएको हुनाले सोहीअनुरूप कपडा उपलब्ध गराइएको हो’, उनले भनिन् । उनले वडासदस्यलाई रकम बाँडेको भन्ने विषयमा आपत्ति जनाइन् । ‘कसैलाई पनि यसरी रकम उपलब्ध गराइएको मलाई जानकारी छैन’, उनले भनिन्, ‘कसैले यस्ता कुरा भनेछन् भने त्यो झुठो हो ।’