काठमाडौँः कृषि, भूमि व्यवस्था तथा सहकारीमन्त्री चक्रपाणि खनाल ‘बलदेव’ले भदौसम्म पनि कुनै सुधार नगरे कालिमाटी बजार नै हटाईदिने चेतावनी दिएका छन् । आफू स्थलगत अनुमगनमा जाँदा कालिमाटी बजारका ९९ वटा स्टलहरु सुधार गर्न जरुरी रहेको पाइएको बताउँदै उनले आफूले भदौसम्म सुध्रने मौका दिएको स्पष्ट पारेका छन् ।
मंगलबार रिपोर्टर्स क्लब नेपालको साक्षात्कारमा बोल्दै मन्त्री खनालले भने, ‘भदौसम्म पनि कुनै सुधार भएन भने हामी आवश्यक परे कालिमाटी बजार नै बन्द गराउन बाध्य हुन्छौं, सुधारको लागि हदैसम्मको समय दिइएको छ, त्यति गर्दा पनि कुनै सुधार भएन भने बजार हटाइन्छ ।’
साक्षात्कारमा बोल्दै उनले कालिमाटी फलफुल तथा तरकारी बजार स्थलमा रहेका स्टलहरु समितिले निर्धारण गरेको मुल्यभन्दा दशौं गुणा बढी लिइएको भेटिएकोले आफूले स्थलगत अनुगमन गरेर निर्देशन दिएको सुनाए ।
‘समितिसँग दश हजारमा स्टलहरु लिएर ती व्यक्तिहरुले उक्त स्टलहरु आफूले नचलाईकन दशौं गुणा बढि पैसा लिएर अरुलाई चलाउन दिईएको भेटियो, दश हजार पर्ने स्टल एक लाख दश हजारसम्म लिएको भेटियो’, उनले भने, ‘यो हदैसम्मको लापरवाही हो, समितिसँग जसले स्टल लिएको हो, उसैले सञ्चालन गर्नुपर्छ, यसको लागि मैले कडाभन्दा कडा निर्देशन दिएको छु ।’
कतिपय स्टलहरुमा उपभोग नै गर्न नमिल्ने कुहिएका र सडेगलेका माछामासु लगायतका वस्तुसमेत राखिएको उनको गुनासो छ । मन्त्री खनालले किसानहरुले आफूले उत्पादन गरेका वस्तुहरु सीधै उपभोक्तासमक्ष पुर्याउने वातावरण बनाउने पनि विश्वास दिलाए । उनले भने, ‘अहिले त धेरै लेयरहरु देखिएका छन्, ती सबै तोड्न जरुरी छ, ताजा वस्तु, सही समयमा त्यो पनि उचित मूल्यमा उपभोक्ताहरुले पाउने वातावरण बनाउँछु ।’
‘काठमाडौंमा हामीले विभिन्न ४२ वटा दुधका नमूना संकलन गरेर परिक्षण गर्दा झण्डै ४० वटा नमूनामा कुनै न कुैन मात्रामा सोडा पाइएको छ’, खनालले दुध र पानीमा कोलिफर्म र सोडा भेटिएको उल्लेख गर्दै भने, ‘तर धेरैजस्तो दुधमा दूध नफाटोस भनेरमात्रै सोडा प्रयोग गरेको पाइयो, अब त्यसो पनि गर्नुभएन, उपभोक्ताले स्वच्छ दुध पिउन पाउनुपर्छ।’
त्यस्तै जार र मिनरल वाटर लगायतका पिउने पानीमा समेत कोलिफार्म भेटिएको उनको भनाई थियो । उनले पानीमा देखिएको खराबीमा आफूहरुले दिएको निश्चित् समयसिमाभित्र पनि सुधार नगरे बाध्य भएर पानी उद्योगमा तालाबन्दी गर्ने पनि चेतावनी दिए ।
मन्त्री खनालले भने,‘पानीको ४२ वटा नमूना लिँदा झण्डै ३९ नमूनामा कोलिफार्मको मात्रा भेटिएको थियो, यसलाई पनि शुन्यमा झार्नुपर्छ, मन्त्रालयमा गठित अनुगमन संयन्त्रलाई निर्देशिका तत्काल लागु गर्नका लागि मैले निर्देशन समेत दिएको छु ।’
आगामी तीन महिनाभित्र सुधार नभए निर्देशिका बमोजिम जनताको स्वास्थ्यमा खेलबाड गर्नेलाई आवश्यक कारबाही गरिने उनको चेतावनी थियो । यद्धपी उनले अहिले बजारमा हल्ला भएजस्तो दुधमा युरिया भने नभेटिएको दाबी गरे ।
‘यो सरकार एकाध पुपुलिष्ट, प्रचारात्मक र लोकप्रिय काम गर्नको लागि आएको होईन, यो सरकार स्थायी छ, हामी योजनावद्ध ढंगले अघि बढ्छौं, आर्थिक समृद्धि र विकास सरकारको मूल नारा छ, यो नारालाई सार्थक बनाउनेगरि काम गर्छौं’, सरकारको प्रभावकारितामा प्रश्न गर्ने बेला नै नभएको उनको जिकिर छ । उनले भने, ‘लोकप्रियता हाँसिल गर्नको लागि मात्रै सरकार गठन भएकै होईन, हामीले छिमेकी मित्रराष्ट्रहरुसँग नयाँ सम्बन्ध कायम गरेर विकास र समृद्धिमा सहयोग लिन्छौं ।’
प्रतिक्रिया दिनुहोस !
