काठमाडौं : नगर-नगर साझेदारी कार्यक्रमअन्तर्गत काठमाडौं महानगरपालिकाले छिमेकी नगरपालिका टोखालाई बालमैत्री उद्यान निर्माण गर्न एक करोड रुपैयाँको दिएको छ । महानगरका प्रमुख विद्यासुन्दर शाक्यले टोखा नगरका प्रमुख प्रकाश अधिकारीलाई बुधबार काठमाडौंमा आयोजित एक कार्यक्रममा एक करोडको चेक हस्तान्तरण गरेका हुन् ।
टोखा नगरको पूर्वाधार निर्माणअन्तर्गत बालमैत्री पार्क निर्माणका लागि प्रस्ताव प्राप्त भएपछि महानगरले आर्थिक वर्ष २०७४÷०७५ मा विनियोजन रकमबाट उक्त रकम उपलब्ध गराइएको हो । दुई नगरबीच सम्पन्न सम्झौताका आधारमा उक्त रकम टोखा नगरपालिका वडा नं. १ बौडेश्वर महादेव क्षेत्रको गुरुयोजनाभित्र समेटिएको बाल उद्यान निर्माणमा खर्च हुनेछ ।
तीन वर्षभित्र निर्माण गरिसक्नु पर्ने सम्झौता गरी रकम हस्तान्तरण गरिएको हो । टोखा नगरले यस क्षेत्रलाई पर्यटकीय स्थलका रुपमा विकास गर्न करिब २५ करोडको लागत अनुमान गरेर गुरुयोजना तयार पारेको छ ।
छाडा चौपाया व्यवस्थापनमा पनि सम्झौता
महानगरले सडकमा छोडिएका चौपाया तथा सामुदायिक कुकुर व्यवस्थापनमा जनचेतना अभिवृद्धि गर्न सदुगुरु सेवा कुटुम्ब मन्त्रादेवी मन्दिर त्रिपुरेश्वरसँग सम्झौता गरेको छ । महानगरका सहसचिव राजेश्वर ज्ञवाली र मन्दिरका तर्फबाट अध्यक्ष सुप्रभात बस्नेतले हस्ताक्षर गर्नुभएको सम्झौता एक बर्षका लागि छ ।
यस अवधिमा मन्दिर पक्षले सडकमा भेटिएका वेवारिसे गाई, गोरु, वाच्छा—बाच्छी, साँढे, कुकुरजस्ता चौपायाको उद्धार तथा औषधि उपचारसमेत गर्नुपर्नेछ । सम्झौताबमोजिम कामको थालनी वडा नं. २ लाजिम्पाट क्षेत्रबाट हुनेछ । यस क्रममा भेटिएका चौपायाको ट््यागिङ् गर्ने, कम्प्युटरकृत अभिलेख तयार पार्ने काम हुनेछ । यी सबै कामका लागि महानगरले १० लाख रुपैयाँ उपलब्ध गराउनेछ ।
प्रतिक्रिया दिनुहोस !
