तुलसीपुर : दाङमा साउनमा आएको बाढीले भत्काएका संरचनाहरू नबन्दै यो वर्ष बाढी आएको छ । अर्काे वर्षा सुरु भइसक्दासम्म अघिल्लो वर्ष बाढीले भत्काएका सडक निर्माण नहुँदा सवारी आवागमनमा समस्या हँुदै आएको छ ।
तुलसीपुर–घोराही सडकखण्डको राजापुरमा पूरै सडक बगाउँदा तीन दिन खडकखण्डको यातायात अवरुद्ध भएको थियो । अस्थायी रूपमा डाइभर्सन बनाएर गाडी सञ्चालन गरियो । त्यो गरेको पनि एक वर्ष पूरा भयो । तर, अहिलेसम्म त्यसको स्थायी पुनःनिर्माण भएको छैन । त्यो डाइभर्सनले अहिले पनि जोखिम बढाइरहेको छ । राप्ती राजमार्गमा पहिरोका कारण धेरै क्षति भयो । पहिरो पन्छाएर एउटा गाडी वारपार हुने ठाउँ बनाइयो तर सडक अहिलेसम्म पनि पूरै सञ्चालनमा आउन सकेको छैन । दाङ सुर्खेत सडकमा पर्ने खोलाले सडकलाई क्षति पु¥याउँदा अस्थायी रूपमा सडक सञ्चालन गरियो । ती सडक पनि पुनःनिर्माण हुन सकेको छैन ।
विगतमा क्षतिको पुनःनिर्माण र बाढी रोक्ने तयारी नहुँदा यस वर्ष पनि उस्तै नियतिको जोखिम बढेको छ । ०७४ सालको बाढी र पहिरोले जिल्लाका तीन वटा ठूला राजमार्ग र केही सहायक राजमार्गमा ठूलो क्षति पु¥याएको थियो । बाढीका कारण क्षति भएका सडको पुनःनिर्माणमा ४४ करोड रुपैयाँ आवश्यक पर्ने भए पनि मन्त्रालयले रकम उपलब्ध नगराउँदा पुनःनिर्माण गर्न नसकिएको सडक डिभिजन कार्यालय दाङका प्रमुख बद्रीप्रसाद शर्माले जानकारी दिए ।
पूर्वपश्चिम राजमार्ग, राप्ती राजमार्ग, दाङ–सुर्खेत सडक, तुलसीपुर लमही सडकमा बढी क्षति भएको र त्यसको तत्काल मर्मतबाहेक फेरि पूर्ण निर्माण हुन नसकेको शर्माले जानकारी दिए । उनले सबै क्षति भएको क्षेत्रको आवश्यक अनुगमन गरी मर्मतका लागि स्टिमेट तयार पारेर विभागमा तत्काल पठाइएको भए पनि निर्माणको अनुमति र रकम नआउँदा, जस्तो छ त्यस्तै अवस्थामा राखिएको बताए । ‘साउन २८ मा बाढी पहिरोले क्षति गरेलगत्तै भदौ २ मा पुनःनिर्माणका लागि रकम माग गरेका थियौं, त्यसपछि पनि पटकपटक त्यसमा ताकेता र चासो बढायाँै’, शर्माले भने, ‘तर अर्काे वर्षा सुरु भइसक्यो प्रभावित संरचना पूरा गर्न सकेनौं ।’
बाढीले क्षति पु¥याएका सडकमा अहिलेसम्म अस्थायी रूपमा बनाइएको संरचनाबाट सवारी साधनहरू सञ्चालन भइरहेका छन् । आपतकालीन कार्य गरेको रकमसमेत अहिलेसम्म भुक्तानी भएको छैन । सडक बगाएको स्थानमा अस्थायी डाइभर्सन बनाएर गाडी गुडाएको र त्यसपछि रकम अभावले स्थानीय संरचना निर्माण गर्न नसकेको उनले बताए । सडकसँगै बाढीका कारण क्षति भएका अन्य संरचनाको समेत यस वर्ष मर्मत तथा पुनःनिर्माण हुन सकेको छैन । ०७४ सालको बाढीले दाङमा मात्रै २ अर्ब बढीको क्षति पु¥याएको थियो ।
प्रतिक्रिया दिनुहोस !
