विदुर : नुवाकोटको पूर्वीभेगमा रहेको दुर्गम बेतिनीमा उपचार अभावमा एक सुत्केरीको ज्यान गएको छ । सदरमुकाम विदुरदेखि ४५ किलोमिटर पूर्वमा रहेको दुप्चेश्वर गाउँपालिका–४ बेतिनी हिलेकी २४ वर्षीया सुत्केरी विमला तामाङको उपचार अभावमा बिहीबार साँझ मृत्यु भएको दुप्चेश्वर गापा अध्यक्ष योविन्द्रसिंह तामाङले शुक्रबार जानकारी दिए ।
बुधबार घरमा छोरा जन्माएकी विमलालाई उपचारका लागि स्वास्थ्य संस्थामा लैजाने क्रममा बाटोमा ज्यान गएको अध्यक्ष तामाङले बताए । स्थानीय भने उपचार नगरी धामीझाँक्रीको भर परेर स्वास्थ्य संस्थामा नलैजाँदा उनको अकालमै ज्यान गएको बताउँछन् ।
सुत्केरी भएपछि धेरै रक्तस्राव भएको, साल अड्किएको र उपचारका लागि स्वास्थ्य संस्थामा लैजाने क्रममा मृत्यु भएको अध्यक्ष तामाङले जानकारी दिए । बुधबार दिउँसो सुत्केरी भएकी विमला तामाङको साल नझरेपछि स्वास्थ्य संस्थामा नलगी धाँमी झाँक्री लगाएका थिए ।
धामी झाँक्री लगाउँदा पनि साल नझरेपछि राति स्वास्थ्य संस्था लैजाने क्रममा मृत्यु भएको स्थानीय बताउँछन् । स्थानीय स्वास्थ्यचौकीमा नियमित गर्भ परीक्षण गर्न विमला नआएको र मृत्यु भएपछि मात्र घटनाको जानकारी पाएको स्थानीय स्वास्थ्यचौकीले जनाएको छ ।
घरमै बच्चा जन्मिएपछि साल नझरेकाले धेरै रक्तस्राव भएका कारण मृत्यु भएको हो । बेलैमा स्वास्थ्य संस्थामा पु¥याएको भए सुत्केरीको ज्यान बचाउन सकिने सम्भावना निकै रहेकोमा उपचार अभावमा ज्यान गएको स्थानीयले बताए ।
उच्च रक्तस्रावका कारण आमाको मृत्यु भए पनि नवजात बालक भने सकुशल रहेको छिमेकी ज्ञानबहादुर तामाङले बताए । अशिक्षा र अज्ञानताले यस्तो हुन पुगेको जनाइएको छ ।
प्रतिक्रिया दिनुहोस !
