प्युठान : नेपाली कांग्रेसले पार्टीलाई जीवन्त बनाउन विशेष योगदान पुर्याउने व्यक्तिहरूलाई स्वतन्त्र सेनानी सम्मान कार्यक्रमबाट सम्मानित गरेको छ । देशभर संचालन हुने सम्मान अभियान शनिवारदेखि प्यूठानबाट शुरु भएको हो । मूक्ती सेनाका कमान्डरदेखि विभिन्न समयमा जेल जीवन बिताएका पार्टीका नेता, कार्यकर्ताहरूलाई सम्मान प्रदान गरिएको छ । ‘स्वतन्त्रता सेनानी सम्मान अभियान’ मार्फत जिल्लाका ६५ जनालाई प्रमाणपत्र र दोसल्ला ओडाएर सम्मान गरिएको छ ।
पार्टीलाई उचाईमा पुर्याउन आ–आफ्नो क्षेत्रबाट विशेष योगदान गरेका व्यक्तिहरूलाई जिल्ला समितिले छनौट गरेको थियो । पार्टीकै कामको शिलशिलामा विपक्षी दलका कार्यकर्ताको कुटाइले मृत्युलाई जितेर बाँचेका जिल्लाका दुईजना ‘जिउँदा सहिद’को रूपमा सम्झेर समेत कांग्रेसले सम्मान गर्यो । झिमरुक गाउँपालिका–२ बाँदीकोटका नोम बहादुर थापा र माण्डवी गाउँपालिका–२ मर्कावाङका मान वहादुर वलीले सम्मान पाएपछि खुसी थपिएको अनुभव सुनाए । थापा तत्कालिन समयमा नेकपा मसाल र वली माओवादीको खुकुरी प्रहारबाट जोगिएका थिए ।
अग्रजले देखाएको सही मार्गमा डोर्याउन सम्मान अभियानले महत्वपूर्ण भूमिका निर्वाह गर्ने कांग्रेसका केन्द्रिय सदस्य एवं अभियानका संयोजक प्रदीप पौडेलले विश्वास व्यक्त गरेका छन् । प्यूठान नगरपालिका–९ स्थित मरन्ठानाबाट थालिएको अभियान देशैभरि सञ्चालन गर्ने योजनामा रहेको उनले सुनाए । जनताको स्वतन्त्रताका लागि योगदान गरेका २००६ सालदेखिका अग्रजहरूलाई पहिलोपटक सम्मान कार्यक्रम ल्याइएको कांग्रेसले जनाएको छ । राष्ट्रिय योजना आयोगका पूर्वउपाध्यक्ष प्राध्यापक डा.गोविन्दराज पाखरेलले कांग्रेस जन्माउनेहरूको अभिलेख तयार गर्न सम्मान अभियानले विशेष भूमिका खेल्ने विश्वास व्यक्त गरे । फूटेको कांग्रेसलाई एक ढिक्कामा उभ्याउन यस्ता अभियानको सार्थकता रहने कार्यकर्ताहरूले विश्वास व्यक्त गरेका छन् ।
प्रतिक्रिया दिनुहोस !
