शर्मिला पाठक
काठमाडौं ः भूकम्पका कारण क्षतिग्रस्त बाघदरबारमा अब परम्परागत, मध्यकाल र आधुनिक गरी तीन काल खण्डको ढाँचा उपयोग हुने भएको छ ।पुरातत्व विभागले भत्काउन स्वीकृत दिएपछि बाघ दरबारको नामले चिनिने हरि भवन भत्काइने र उक्त भवनमा यस्तो ढाँचा उपयोग गरिने भएको हो । उक्त दरबारमा पाटेबाघ पालेकाले बाघदबार भनिएको हो ।
तीन भागमा निर्माण हुने सो भवनको पहिलो भागलाई तीन तला, लिच्छवीकालीन शैलीको दोस्रो भागलाई साढे ६ तला र आधुनिक शैलीको तेस्रो मोहडालाई १५ तलामा प्रस्ताव गरिएको छ । ‘करिब १८ रोपनी क्षेत्रफलमा निर्माण भएको हालको हरिभवन तीन तलाको छ, भवन छिट्टै भत्काउन खरिद प्रक्रियामा लगिने छ’, काठमाडौं महानगरपालिकाका सह–प्रवक्ता नमराज ढकाल भन्छन् ।
भत्काउने काम सुरु भएको तीन महिनामा सकिने र एक अर्ब ५० करोडको लागतमा पुनःनिर्माण गरिने उनको भनाई छ । भवनको निर्माण कार्य सुरु भएको तीन वर्षमा सम्पन्न गरी प्रयोगमा ल्याइने महानगरपालिकाको योजना छ ।
गत असोजको पहिलो साता कामपाले पुनःनिर्माण प्रक्रिया अघि बढाए पनि विभागले रोक लगाएको थियो । उक्त भवनका योजनाकार इञ्जिनियर प्रेमबहादुर श्रेष्ठले हरिभवन नयाँ शैलीको हुने भएकाले उक्त भवन नेपालकै नमूना भवन हुने दाबी गरे ।
परम्परागत पाटी, ढुंगेधारा, चोक आदि निर्माण हुने सो भवनमा अपांगमैत्री शौचालय, पर्याप्त लिफ्ट, विपत्तिको सामना गर्न आकस्मिक कक्षको निर्माण र आकाशे पानी संकलनजस्ता काम हुनेछन् ।
महानगरको यो भवनमा प्रमुख, उपप्रमुख, प्रमुख प्रशासकीय अधिकृतसहित सबै कर्मचारी अटाउने छन् भने एकै ठाउँमा प्रमुख, उपप्रमुख, इजलास, बोर्ड हल, न्यायिक समितिको कार्यकक्ष, इजलास र कार्यपालिकाको बैठक कक्ष पनि हुनेछन् ।
भवनमा विविध विशेषतायुक्त चारवटा चोक/आँगन रहने भएकोमा मुख्यचोक र प्रमुखलाई भेट्न जाँदा देखिने चोक परम्परागत नेवारी शैलीका हुनेछन् ।रासस
प्रतिक्रिया दिनुहोस !
