अन्नपूर्ण: अन्नपूर्ण पोस्ट् दैनिकका प्यूठान संवाददाता केशर रोकालाई युवा प्रतिभा पुरस्कार प्रदान गरिएको छ । राष्ट्रिय यूवा परिषद्को सहयोगमा जिल्ला यूवा समितिको कार्यालय प्यूठानले सोमवार सदरमुकाम खलंगामा कार्यक्रम गरी रोकालाई नगद सात हजार रुपैयाँ र सम्मानपत्र प्रदान गरेको हो ।
पत्रकारितामार्फत विभिन्न उद्यम, पेशा, व्यवसायमा लागेका युवाहरुको प्रतिभालाई ऊजागर गर्न महत्वपूर्ण भूमिका निर्वाह गरेको भन्दै सम्मान गरिएको समितिका अध्यक्ष नेगनसिंह कुवँरले जानकारी गराए । प्रतिभाशाली युवाहरुको खोजी, पहिचान र प्रोत्साहनका लागि सञ्चारजगतको विशेष योगदान रहने उनले विश्वास व्यक्त गरे ।
प्रत्येक वर्ष समितिले युवाहरुलाई प्रतिस्पर्धाको आधारमा सम्मान र पुरस्कृत गर्दै आएको छ । रोकासँगै सञ्चारकर्मी राधिका भुषाल, आयूष्मा होटलका सञ्चालक नवीन जिसी, बिजुवारका ग्रिल व्यवसायी अर्जुन विक, फर्निचर व्यवसायी विमल गुरुङ र विजुवारमा सिरक डसना उद्योगका सचालका प्रदीप केसी सम्मानित भएका छन् ।
जिल्लालाई आत्मनिर्भर हुने गरी उत्पादनमा जोड दिन र सफल उद्यमीलाई प्रोत्साहन गर्ने गरी समाचार सम्प्रेषण गर्न प्रमुख जिल्ला अधिकारी डा.कृष्ण बहादुर घिमिरेले उद्यमी, व्यवसायी र सञ्चारकर्मीलाई सुझाव दिए ।
प्रतिक्रिया दिनुहोस !
