काठमाडौ: पछिल्लो समय सिंगल ट्र्याक लिएर सांगीतिक क्षेत्रमा आउने गायक गायिका धेरै छन् । धेरै गीत समेटेर एल्बम निकाल्नुपर्ने झन्झट टरेसँगै कलाकारलाई पनि सहज भएको छ ।
सिंगल ट्र्याक लिएर सांगीतिक क्षेत्रमा आउने कलाकारकै लहरमा उभिएकी छन् गायिका निशा कँडेल । लामो समय गायनको प्रशिक्षण लिएकी निशाले पहिलो पटक स्वर दिएको गीत ‘सधैँलाई’ भिडियोसहित श्रोता–दर्शकमाझ आएको छ ।
अमन प्रधानको शब्द तथा संगीत समेटिएको यस गीतलाई राहुल प्रधानले संगीत संयोजन गरेका छन् । गायनमा निकै मेहनत गरेकी निशाले यो गीतको भाव पनि त्यतिकै मन पराएकी छन् । ‘गीतले मायामा परेको र आफ्नो प्रेमीप्रति सधैँ समर्पित भाव बोकेको छ’, उनले भनिन्, ‘मेरो पहिलो गीत चाहेजस्तै भएको छ ।’
राहुल प्रधानले निर्देशन गरेको ‘सधैँलाई’को म्युजिक भिडियोमा निशाले नै मोडलिङ गरेकी छन् भने उनलाई अमन प्रधानले मोडलिङमा साथ दिएका छन् । चक्र महर्जनले छायांकन गरेको भिडियोलाई विजेश पौडेलले सम्पादन गरेका हुन् । पहिलो गीतबाट राम्रो प्रतिक्रिया पाएकी निशा गायनलाई निरन्तता दिने बताउँछिन् ।
प्रतिक्रिया दिनुहोस !
