काठमाडौं : प्रधानमन्त्री केपी शर्मा ओलीले चीन सरकारलाई नेपालकोतर्फबाट एकजोडी गैंडा हस्तान्तरण गरेका छन् । प्रधानमन्त्री ओलीले बिहीबार नेपालका लागि चीनका राजदुत यु होङलाई प्रकृति संरक्षण कोष खुमलटारमा भद्र र रुपसी नामका गैंडाका जोडी हस्तान्तरण गरेका हुन् ।
चीन सरकारलाई नेपालकोतर्फबाट गैंडा हस्तान्तरण गर्दै प्रधानमन्त्री ओलीले नेपाल–चीन सम्बन्धलाई अझ व्यापक बनाउनु पर्ने बताए ।प्रधानमन्त्री ओलीले दुई देशबीचको परम्परागत सम्बन्धलाई गैंडा उपहारले थप मजबुुद बनाएको बताए ।
भृकुटी र अरनिकोबाट सुरु भएको नेपाल–चीन सम्बन्धलाई भद्र र रुपसीले थप गाढा बनाएको उनले बताए । उनले भने,‘भद्र र रुपसी चीनमा आफ्नै घर जस्तो गरी स्वास्थ्य ढंगले हुर्किनेछन् , सन्तान वृद्धि गर्नेछन् ।’
वन्यजन्तुको संरक्षणका लागि सरकार संवेदनशील रहेको प्रधानमन्त्री ओलीले बताए । ‘वन्यजन्तु र प्रकृतिको संरक्षणका लागि हामीले पूर्वदेखि पश्चिमसम्मका बिभिन्न ठाउँमा आरक्षण र संरक्षण क्षेत्र बनाएका छौं,’ प्रधानमन्त्री ओलीले भने ।
प्रधानमन्त्री ओलीले नेपाल वन्यजन्तु र चराचुरुंगीका लागि विशेष क्षेत्र भएको बताए । साइवेरियादेखि श्रीलंकासम्मका चरा नेपालमा प्रजननका लागि आउनु एउटा नमुना भएको उनले बताए ।दुई वर्षभन्दा कम उमेरका भद्र र रुपसी चितवन राष्ट्रिय निकुञ्जबाट ल्याइएको हो ।
प्रतिक्रिया दिनुहोस !
