काठमाडौं : विश्वकप फुटबलको ह्याङओभर सकिनै लाग्दा शुक्रबार एकैदिन चारवटा नेपाली चलचित्र रिलिज हुन लागेका छन् । विश्वकप सुरु भएपछि निर्माताले आफ्ना चलचित्र रिलिज गर्न रोकेका थिए । एकसाथ धेरै चलचित्र रिलिज हुँदा कसले धेरै हल पाउने र कसले कस्तो व्यापार गर्ने हो भन्ने चर्चा चलेको छ । मिलन चाम्स निर्देशित बबी, शोभित बस्नेत निर्देशित बाबु कान्छा, राजबहादुर साने निर्देशित वीरांगना र कल्याण अधिकारी निर्देशित यो पागल मन देशव्यापी प्रदर्शनमा आउन लागेका हुन् ।
वास्तविक कथा र पात्रमाथि निर्माण भएको चलचित्र बबी निकै आशातीत चलचित्र हो । भागेर विवाह गरेका उमेश थापा र कविता गुरुङको प्रेमकहानी समेटिएको चलचित्रमा उनीहरूकै संघर्ष समेटिएको छ । सानै उमेरमा अन्तरजातीय विवाह गर्दा उब्जिएका विविध परिस्थितिलाई फिल्म ‘बबी’ मार्फत यी दुई जोडीले दर्शकसामु ल्याउन लागेका हुन् । मिलन चाम्स निर्देशक तथा निर्माता रहेको यस फिल्मको मुख्य भूमिकामा उमेश र कविताको नै अभिनय रहेको छ । तर रियल लाइफको कहानीलाई रिल लाइफसम्म ल्याउने विषय त्यति सजिलो नभएको बताउँछन् उमेश । ललितपुरको गरिब परिवारमा जन्मिएका उमेश थापा १५ वर्षको उमेरमा नै कामको खोजीमा नर्वे गएका थिए । एसएलसीमा प्रथम श्रेणीमा उत्तीर्ण भएका उमेशलाई इलेक्ट्रोनिक इन्जिनियरिङ पढ्न परिवारले नेपाल फर्काएपछि उनी २०५४ मा पोखराको लामाचौरमा इन्जिनियरिङ भर्ना भए । पोखरा बसाइँको क्रममा उनको भेट कविता गुरुङसँग भयो । कविता लेखनाथ अर्घौंचोककी धनी परिवारकी छोरी थिइन् । पहिलो भेट रिस र दुश्मनीबाट सुरु भएको यो जोडी पछि प्रेमबन्धनमा बाँधिए ।
प्रेमकथाका साथै पारिवारिक फिल्म भनिएको बबीको छायांकन नर्बे, काठमाडौं र पोखरामा गरिएको हो । फिल्ममा बोलिएका सबै डाइलग असली भएको निर्देशक मिलन चाम्स बताउँछन । उनी भन्छन्, ‘फिल्ममा कहानी मात्र होइन उमेश र कविताको भेट भएको स्थानदेखि थुप्रै ठाउँसमेत हुबहु सुटिङ गरिएको छ ।’ चलचित्रमा कविता र उमेशसहित विजय लामा, रुवी राना, शूरवीर पण्डित, श्याम राईलगायतको अभिनय देख्न सकिनेछ ।
उता अभिनेता अनुपविक्रम शाही र अभिनेत्री शिल्पा पोखरेलले पहिलो पटक स्क्रिन साझेदारी गरेको चलचित्र वीरांगना’ पनि मैदानमा आएको छ । । यो जोडी एकसाथ पर्दामा देखिन लागेका कारण पनि दर्शकमा अलि बढी नै चासो छ । दुवै सशस्त्र प्रहरीको भूमिकामा छन् ।
अनुप प्रचारमा नहिँड्दा यसको फाइदा अर्का अभिनेता पृथ्वीराज प्रसाईंलाई भएको छ । प्रज्ज्वल गिरी, सुशील पोखरेल, ध्रुव कोइराला, प्रिया रिजाल, धीरेन शाक्यलगायतको अभिनय रहेको छ । राजबहादुर सानेको लेखन तथा निर्देशन रहेको फिल्म ‘वीरांगना’ फोर्थ आई मुभिजको ब्यानरमा बाबुराम दास, श्यामबहादुर थापा, रघु परियार, देव तामाङ र विमला भट्टले निर्माण गरेका हुन् ।
यो पागल मनमा गौरी मल्ल, विनोद न्यौपाने, ऋचासिंह ठकुरी, राजेश ढुंगाना, एनी कँुवर यस चलचित्रमा मुख्य अभिनय रहेको छ । त्रिकोणात्मक प्रेमकथामा आधारित यस चलचित्रमा विनोद न्यौपानेलाई लभर ब्वाईको रूपमा देखाइएको छ भने नाइँ नभन्नु ल मार्फत चलचित्रमा डेब्यु गरेकी नायिका ऋचासिंह ठकुरी पाँच
वर्षपश्चात् यसै चलचित्रमार्फत पुनआगमन गर्दै छिन् । यस्तै यो चलचित्रमा गौरी मल्ल पनि सशक्त भूमिकामा छिन् । चलचित्रको प्रदर्शनीका लागि आफू निकै उत्साहित रहेको कल्याणको भनाइ छ । चलचित्रमा अर्जुन पोखरेलको संगीत, राजु किराँत राईको द्वन्द्वनिर्देशन, दयाराम पाण्डेको गीत रहेको छ । काठमाडौं उपत्यका र मोफसलमा धेरै हल पाउन नसकेको कल्याणको गुनासो छ । यो चलचित्रले काठमाडौं उपत्यकामा सात र मोफसलमा १२ सिनेमा हल पाएको पनि निर्देशक तथा निर्माता कल्याण अधिकारीले जानकारी गराए ।
यस्तै ‘बाबु कान्छा’ लाई सेन्सरबोर्डले युनिभर्सल सर्टिफिकेट दिएको छ । सेन्सरबोर्डले दिएको यो सर्टिफिकेटका आधारमा फिल्मलाई बालबालिकादेखि सबै उमेरसमूहका व्यक्तिले हेर्न पाउने भएका छन् । माया प्रेम र रोमान्सका दृश्यलाई कलात्मक ढंगले चलचित्रमा समेटिएको छ । निर्देशक बस्नेतकै लेखन तथा निर्माण रहेको फिल्ममा गौतमराज खड्काको सम्पादन, अष्ट महर्जनको एक्सन, टंक बुढाथोकी र लक्ष्मण शेषको संगीत, बाबु श्रेष्ठको छायांकन रहेको छ । बाबु कान्छामा सलोन बस्नेत, करिश्मा श्रेष्ठ, सरोज खनाल, नीर शाह, राजाराम पौडेल, सम्राट सापकोटा, लय संग्रौला, मञ्जु पौडेल, सुशान्त श्रेष्ठलगायत कलाकारको पनि अभिनय छ ।
प्रतिक्रिया दिनुहोस !
