विश्वकप फुटबलको महासंग्राम क्लाइमेक्समा पुगेसँगै निकै अपेक्षा गरिएका तीन चलचित्र ‘बोबी’, ‘वीराङना’ र ‘बाबु कान्छा’ शुक्रबार एकसाथ रिलिज भएका छन् ।
चलचित्र ‘लिलि बिली’ पछि मिलन चाम्स निर्देशित ‘बोबी’, शिल्पा पोखरेल अभिनित सफल चलचित्र ‘मंगलम’ प्रदर्शन भएपछि दर्शकमाझ आएको ‘वीराङ्गना’ र छोरालाई हिरो बनाएर शोभित बस्नेतले आफ्नै लगानी, लेखन एवम् निर्देशन रहेको चलचित्र ‘बाबु कान्छा’बीचको प्रतिष्पर्धा रोचक हुने निश्चित छ ।
काठमाडौँ: विश्वकप फुटबलको महासंग्राममा सुस्ताएको नेपाली चलचित्रले फुटबलको रौनक क्लाइमेक्समा पुगेसँगै बजार खोज्ने प्रयास गरेको छ । शुक्रबारे संस्कृतिलाई पछ्याउँदै असार २९ गते तीन चलचित्र ‘बोबी’, ‘वीराङ्गना’ र ‘बाबु कान्छा’ एकै साथ रिलिज भएका छन् । यी तीनै अपेक्षा गरिएका राम्रा चलचित्र हुन् । यी सबैको आ–आफ्नै विशेषता र प्रभाव छ ।
दर्शकले मन पराएको चलचित्र ‘लिलि बिली’ पछि मिलन चाम्स निर्देशित चलचित्र ‘बोबी’ दर्शकमाझ आएको हो । त्यस्तै अर्को सफल चलचित्र ‘मंगलम’ प्रदर्शनपछि शिल्पा पोखरेल अभिनित भएकाले ‘वीरङ्गना’लाई पनि दर्शकले रुचाउने विश्वास गरिएको छ । उता आफ्नै लगानी, लेखन र निर्देशनमा शोभित बस्नेतले निकै मेहनत गरेको चलचित्र ‘बाबु कान्छा’ समेत आक्रमक प्रचारसहित मैदानमा ओर्लिएको छ ।
वास्तविक कथामा वास्तविक पात्रले अभिनय गरेको चलचित्र ‘बोबी’ नर्बे, काठमाडौं र पोखरामा छायांकन गरिएको छ । भागेर अन्तरजातीय प्रेम विवाह गरेका उमेश थापा र कविता गुरुङको प्रेम कथा समेटिएको यस चलचित्रमा बोलिएका संवाद समेत असली भएको निर्देशक मिलन चाम्सको भनाइ छ ।
‘चलचित्रको कथामात्रै होइन उमेश र कविताको भेट भएको र जीवन व्यतित भएका स्थानमै छायांकन गरिएको छ’, उनले भने, ‘उमेश र कविताको वास्तविक कथामा अन्य कलाकार भिज्न नसक्ने सम्भावना भएकाले वास्तविक पात्र लिएको हुँ ।’
चलचित्रमा कविता र उमेशसहित विजय लामा, रुवी राना, शूरवीर पण्डित, श्याम राईलगायतले अभिनय गरेका छन् । चलचित्र ‘वीराङ्गना’बाट निकै आशावादी छिन् नायिका शिल्पा पोखरेल । कानुनको रक्षाका लागि एक सशस्त्र प्रहरी महिलाले गर्ने योगदानको कथा उठाइएको चलचित्रमा उनी देशभक्त, लडाकु नारी अर्थात विराङनाकै भूमिकामा देखिएकी छन् ।
राजबहादुर सानेले निर्देशन गरेको यस चलचित्रमा हास्य, एक्सन, रोनाधोना, वीरता सबै समेट्ने प्रयास गरिएको छ । ‘मलाई चलचित्रले दर्शकको मन जित्ने कुरामा विश्वास छ’, निर्देशक सानेले भने, ‘यसपटक दर्शकले चाहेजस्तो मसलेदार चलचित्र हेर्न पाउनुहुनेछ ।’ चलचित्रमा शिल्पाको अपोजिटमा अनुपविक्रम शाहीले अभिनय गरेका छन् ।
चलचित्र ‘बोबी’ र ‘वीरङ्गना’लाई टक्टर दिन मैदानमा ओर्लिएको छ शोभित बस्नेतको लगानी, लेखन तथा निर्देशन रहेको अर्को चलचित्र ‘बाबु कान्छा’ । निर्देशक शोभितले छोरा सलोन बस्नेतलाई यस चलचित्रमा मुख्य भुमिकामा अभिनय गराएका छन् ।
चलचित्र ‘ए मेरो हजुर २’बाट प्रशंसा पाएका सलोनसहित, नीर शाह, सरोज खनाल, राजाराम पौडेल, लय संगौला, करिस्मा श्रेष्ठ, ऋतिक शाही, सम्राट सापकोटा, गीता अधिकारी आदिले चलचित्रमा अभिनय गरेका छन् । यस चलचित्रबाट अश्लिन ज्ञवाली र ज्योत्सना महर्जनले डेव्यू गरेका छन् ।
प्रतिक्रिया दिनुहोस !
