धनकुटा : सुनसरी खनारका श्रीप्रसाद यादव बुधबार दिउँसो भेंडेटारस्थित नमस्ते झरना आइपुगे । झरना प्रवेशद्वारमा ताल्चा झुन्डिएको देखेपछि उनी निराश हुँदै फर्किए ।
उनीजस्तै धेरै पर्यटक गर्मीका बेला दिनहुँ झरनामा रमाउन आउने गर्छन् । तर, झरना घुम्न नपाउँदा त्यत्तिकै फर्किने गर्छन् । झरनाको चिसो पानीमा रमाउँदै गरेका इटहरीका एक व्यक्तिको जेठ अन्तिम साता ढुंगा लागेर मृत्यु भएपछि व्यवस्थापन समितिले झरना प्रवेशमा रोक लगाएको छ । समितिले सर्वपक्षीय छलफल गरी असार १ गतेदेखि पर्यटकलाई झरना प्रवेशमा रोक लगाएको हो । यससँगै झरना आसपास सञ्चालित तीन दर्जनभन्दा बढी होटल अहिले सुनसान बनेका छन् ।
पाँच वर्षदेखि होटल सञ्चालन गरिरहेका केशव तामाङका अनुसार झरना प्रवेशमा रोक लागेसँगै होटलको भाडा तिर्न पनि ऋण खोज्नुपर्ने अवस्था आएको बताए । ‘केही महिनाअघिसम्म ग्राहकको अर्डर पूरा गर्न भ्याइनभ्याइ हुन्थ्यो । एकछिन फुर्सद हुँदैनथ्यो’, उनले भने, ‘तर, अहिले सुनसान होटल रुघेर दिन काटिरहेका छौं ।’ सम्बन्धित निकायले छिटो पूर्वाधार बनाएर झरना प्रवेश खुला गर्नुपर्ने उनको भनाइ छ ।
धरानबाट आएर एक महिनादेखि होटल सञ्चालन गरिरहेका गोपाल विष्टले भने, ‘अरू बेला होटलको कारोबार राम्रो हुन्थ्यो तर अहिले ठप्प छ ।’
धेरै व्यवसायीले घर भाडामा लिई होटल सञ्चालन गरिरहेका छन् । एक व्यवसायीले १५ देखि २० हजार रुपैयाँसम्म घरभाडा तिर्ने गरेको जनाइएको छ । तर, कारोबार ठप्प भएको महिना पुगिसक्दा आफूहरू मारमा परेको विष्टले बताए ।
व्यवसायीका अनुसार प्रत्येक होटलमा भौतिक संरचनाबाहेक ५ लाख रुपैयाँ लगानी छ । अधिकांशले बैंकबाट ऋण लिएर होटल सञ्चालन गरेका हुन् ।
झरना हेर्न दैनिक कम्तीमा १५ सयसम्म पर्यटक आउँथे । यहाँ आउने अधिकांश पर्यटक भारतीय रहेको जनाइएको छ तर अहिले पर्यटक आगमन शून्यप्रायः छ । पर्यटक आउने सिजनकै बेला कारोबार शून्य हुँदा खर्च धान्न गाह्रो परेको व्यवसायीको भनाइ छ ।
झरना वरिपरि ढुंगा खस्न सक्ने ठाउँमा तारजाली लगाउने काम भइरहेकाले पर्यटकलाई रोक लगाइएको व्यवस्था समितिका अध्यक्ष दिलीप सुब्बाले बताए । झरना प्रवेशमा रोक लगाइएको सूचनाको ब्यानर विभिन्न ठाउँमा टाँसिए पनि दैनिक सयौं पर्यटक आएर निराश भई फर्किने गरेको उनको भनाइ छ । यहाँको असर भेंडेटार, धरान र इटहरीमा सञ्चालित होटल व्यवसायमा पनि पुगेको उनले सुनाए । ‘यहाँ घुम्न आउने पर्यटकले स्थानीय कृषिजन्य वस्तु किनेर लैजान्थे’, उनले भने, ‘शनिबार त हाट लागेजस्तै हुन्थ्यो तर अहिले सुनसान छ ।’
प्रतिक्रिया दिनुहोस !
