राजविराजः जिल्लाको दक्षिण सिमानाकामा अवस्थित छिन्नमस्ता गाउँपालिकामा आइतबार एउटा निलगाई फेला परेको छ ।
दुर्लभ वन्यजन्तुको रुपमा रहेको निलगाई त्यस गाउँमा एक्कासी देखिएको स्थानीय बासिन्दाले बताएका छन् । छिन्नमस्ता गाउँपालिका–४ लालापट्टीस्थित भित्री गाउँमा स्थानीयवासीले लखेटदै गरेको अवस्थामा सशस्त्र प्रहरीले फेला पारी नियन्त्रणमा लिएको सशस्त्र प्रहरी बल नेपाल बोर्डर आउट पोस्टका सशस्त्र प्रहरी निरीक्षक तेजबहादर जोराले जानकारी दिए ।
सशस्त्र प्रहरी निरीक्षक जोराको नेतृत्वमा नौ जना नेपाल प्रहरी र स्थानीयवासीको संयुक्त प्रयासमा नियन्त्रणमा लिई संरक्षणका लागि जिल्ला वन कार्यालयमा बुझाइएको छ । जोराका अनुसार जंगली निलगाई करिब तीन फिट अग्लो ४५ किलोग्रामको रहेको छ ।
आफ्नो समूहबाट छुटिएर खोलै–खोला निलगाई दक्षिण सिमानाको लालापट्टी गाउँ पुगेको जिल्ला वन अधिकृत धिरेन्द्रप्रसाद सिंहले बनाए । माथिल्लो चुरे जङ्गलमा चोरी शिकारीजस्ता कार्यले विनाश भएपछि दुर्लभ वन्यजन्तु निलगाई सप्तरीको तल्लो क्षेत्रतिर पुगेको स्थानीयवासी निर्मल यादव बताउँछन् ।
सशस्त्र प्रहरीले बुझाएको निलगाईलाई जिल्ला बन कार्यालयले आइतबार साँझ सप्तरीको उत्तरी क्षेत्र रुपनीस्थित चुरे जंगलमा सुरक्षित छाडिएको जिल्ला वन अधिकृत सिंहले बताए ।
निलगाई नेपाललगायतका एसियाली राष्ट्रहरूमा पाइने ठूलो प्रजातिको मृग हो । यसको गाईका जस्ता कान, छोटो र बाङ्गो सिङ, गर्दनमा काला छोटा रौँ, घाँटीमा लामा रौँका गुच्छा हुने र बराँठको जस्तो रङ हुन्छ ।
प्रतिक्रिया दिनुहोस !
