काठमाडौं : त्रिवि शिक्षण अस्पताल महाराजगन्जमा कलेजो प्रत्यारोपण गर्ने तयारी अन्तिम चरणमा पुगेको छ । यसअघि भक्तपुरस्थित मानव अंग प्रत्यारोपण केन्द्रले दुई वर्षअघि कलेजो प्रत्यारोपण सेवा सुरु गरेको थियो ।
कलेजो प्रत्यारोपणका लागि एघार करोडको लागतमा अत्याधुनिक पोस्ट अपरेटिभ आइसीयु निर्माण भइसकेको छ ।
सेवा सुरु गर्न त्रिवि शिक्षण अस्पतालले ग्यास्ट्रोइन्टेस्टाइनल हेपाटोविलियरी प्याङक्रियाटीक एण्ड लिभर ट्रान्सप्लान्ट सर्जन डा.रमेशसिंह भण्डारी नेतृत्वको चिकित्सकीय टोली तयारी अवस्थामा राखेको छ । अस्ट्रेलियाबाट प्रत्यारोपणमा दुई वर्षे तालिम लिएका भण्डारीसहित डा.अमित श्रेष्ठ, डा.सुवाश आचार्यलगायतको समूहले कलेजो प्रत्यारोपण गर्ने अस्पतालका कार्यकारी निर्देशक प्रा.डा.दीपकप्रकाश महराले जानकारी दिए ।
प्रत्यारोपण सेवा सुरु गर्न झण्डै २२ जनाको टोली तयारी अवस्थामा छ । उनीहरूले अष्ट्रेलिया, अमेरिका र भारतबाट तालिम लिइसकेका छन् ।
कार्यकारी निर्देशक डा.महराका अनुसार प्रत्यारोपण गर्न चाहने बीस÷बाइस जना बिरामी आइसकेका छन् ।
भारत, सिंगापुर र अष्ट्रेलियाका विशेषज्ञको प्राविधिक सहयोगमा नेपाली सर्जनले प्रत्यारोपण गर्ने छन् । यसका लागि ती देशसँग समन्वय भइरहेको छ । करिब १५ जना बिरामीको कलेजो प्रत्यारोपण गर्दा विदेशीको सहयोग लिने योजना शिक्षण अस्पतालको छ । नेपाली चिकित्सकले महिनामा एक जना बिरामीको कलेजो प्रत्यारोपण गर्ने योजना बनाएका छन् ।
सुरुमा वयस्कको प्रत्यारोपण गरिने ट्रान्सप्लान्ट सर्जन डा.सिंहले जानकारी दिए ।
उपप्रधान एवं स्वास्थ्य तथा जनसंख्यामन्त्री उपेन्द्र यादवले कलेजो प्रत्यारोपणपछि बिरामी राखिने चार शैयाको अत्याधुनिक पोस्ट अपरेटिभ आइसीयुको सोमबार उद्घाटन गरे । शल्यक्रिया गरिएका बिरामीलाई यो कक्षमा चार÷पाँच दिनसम्म राखिन्छ । कलेजो प्रत्यारोपण गर्न विदेशमा झण्डै ८० लाख लाग्ने गरे पनि नेपालमा २५ लाखसम्ममा सेवा दिने तयारी भइरहेको छ ।
अत्यधिक मदिरा सेवन, हेपाटाइटिस बी र सीको संक्रमण एवं फ्याटी एसिडलगायतका कारणले कलेजो बिग्रने गरेको छ । कडापन (सिरोसिस ) भएको अवस्थामा कलेजो बिग्रन्छ । कलेजा बिग्रँदा शरीरमा पानी भरिने, रगतका नसा फुल्ने, आँखा पहेंलो हुनेलगायतका लक्षण देखा पर्छन् ।
प्रतिक्रिया दिनुहोस !
