भक्तपुर
घाँस काट्ने खुर्केर
आयो जोवन हुर्केर
यो जोवन
सदाबहार यस नेपाली लोकगीतका गायक बुद्धिकृष्ण लामिछाने ६४ वर्षमा टेकेका छन् । २०१२ साल साउन १ गते भक्तपुरको साविक वागेश्वरी गाविस वडा ३ मा उनको जन्म भएको हो ।
हाल मधुमेहलगायतका रोगले थलिएका प्रसिद्ध लोकगायक लामिछानेको घरमै गएर मंगलबार भक्तपुरका गायक, गीतकार, संगीतकारलगायतले ६४ औं जन्म दिन मनाएका छन् ।
भक्तपुर सांगीतिक समाजको अगुवाइमा गएका गायक, गीतकार, संगीतकारलगायतले केक काटेर उनको जन्म दिन मनाएका हुन् । उक्त अवसरमा चाँगुनारायण नपाका प्रमुख सोमप्रसाद मिश्रले वरिष्ठ लोकगायक लामिछानेलाई फूलको माला, ढाकाको खादा र कालो भादगाउँले टोपी लगाई दिएर जन्म दिनको शुभकामना दिएका थिए । त्यस्तै लामिछानेलाई उपस्थित सबैले जन्मदिनको शुभकामना दिँदै केक खुवाएका थिए ।
बुबा टीकाराम र आमा ब्रह्मकुमारी लामिछानेका छोरा बुद्धिकृष्ण अहिले मधुमेहका कारण आँखा देख्दैनन् । उनकी जहान दुर्गादेवीका अनुसार मधुमेहको उपचार ढिलो हुँदा आँखामा असर गरेको थियो । एकपटक दुर्घटना नचलेका उनका गोडा अहिले पनि टेक्न हुँदैनन् । त्यसैले उनी आफू घर भित्रबाहिर गर्न नसक्ने भएको दुई तीन वर्ष भएको उनी बताउँछिन् ।
पाँच छोरी र दुई छोराका पिता बुद्धिकृष्णको घर २०७२ साल बैशाखमा आएको भूकम्पले क्षतिग्रस्त बनायो । तर भूकम्प गएको तीन वर्ष पूरा हुँदा पनि उनको बाँस जस्ताको टहरामा भइरहेको छ ।
गएको जेठ १९ गतेमात्रै भक्तपुर सांगीतिक समाजले वरिष्ठ गायक लामिछानेलाई नगद दस हजारसहित सम्मान गरेको थियो । उक्त सम्मान कार्यक्रममै उनको नजिकिँदै गएको जन्मदिनसमेत मनाउने घोषणा गरेअनुसार घरसम्मै पुगेर जन्मदिन मनाएको समाजका अध्यक्ष प्रवीण शाहीले जानकारी दिए ।
उनले अग्रज गायकको सम्मान गर्ने समाजको नीति रहेको बताउँदै प्रत्येक वर्ष वरिष्ठ गायक लामिछानेको जन्मदिन मनाइने सुनाए । चाँगुनारायण नपाका प्रमुख मिश्रले गायक लामिछानेको सम्मानस्वरुप उनको घर पुग्ने सडकको नाउँ नै बुद्धिकृष्ण लामिछाने मार्ग राख्ने प्रक्रिया अघि बढाइएको जानकारी दिए ।
उनले गायक लामिछानेको परिवारलाई आवश्यकताअनुसार नपाले आर्थिक सहयोग गर्ने वचनसमेत दिए । गायक लामिछानेलाई जस्ताको टहराबाट बाहिर ल्याई जन्मदिनको शुभकामनासँगै केक खुवाउँदा उनकी जहान दुर्गादेवीको आँखा थामिएनन् । उनले एक हातले आँसु पुछ्दै श्रीमानलाई केक खुवाएकी थिइन् । रेडियो नेपालका पूर्वकर्मचारीसमेत रहेका गायक लामिछानेका एकसयभन्दा बढी गीत रेकर्ड भएका छन् ।
प्रतिक्रिया दिनुहोस !
