काठमाडौं: प्रदर्शनको तयारीमा रहेको चलचित्र ‘रोमियो एन्ड मुन्ना’को प्रचारमा लागिपरेकी छन् नायिका सृष्टि श्रेष्ठ । मिस नेपाल २०१२ को उपाधि चुमेपछि सामाजिक पहिचान बनाएकी उनले चलचित्र ‘गाजलु’बाट रजतपट डेब्यु गरेकी हुन् ।
अनमोल केसीका साथमा अभिनय गरेको आफ्नो पहिलो चलचित्रले अपेक्षाकृत व्यावसाय गर्न नसक्नुका साथै कामको प्रशंसा पनि नभएपछि उनले आगामी चलचित्रबाट त्यो छाप मेट्न चाहेकी छन् । गाजलुपछि उनले चलचित्र ‘रोमियो एन्ड मुन्ना’ र ‘बाँध मायाले’मा पनि अभिनय गरेकी छन् । चलचित्र ‘रोमियो एन्ड मुन्ना’ साउन ११ गते रिलिज हुँदैछ ।
यस चलचित्रबाट उनले निकै अपेक्षा गरेकी छन् । चलचित्रको प्रचारका लागि उनले निकै मेहनत गरीरहेकी छन् । यो चलचित्र उनको अभिनय यात्राका लागि महत्वपूर्ण मानिएको छ । यदि यो चलचित्रले पनि अपेक्षाकृत व्यावसाय गर्न नसके तथा सृष्टिको कामको प्रशंसा भएन भने उनको चलचित्र यात्रा अप्ठ्यारोमा पर्न सक्ने सम्भावना रहन्छ ।
प्रशन्न गोपालीको लगानीमा नरेशकुमार केसीले निर्देशन गरेको चलचित्र ‘रोमियो एन्ड मुन्ना’ मा विनय श्रेष्ठ र सृष्टि श्रेष्ठ शीर्ष भुमिकामा छन् । चलचित्र ‘डाइङ क्यान्डल’बाट प्रशंसा कमाएका निर्देशक केसीले यस चलचित्रमा निकै मेहनत गरेकाले दर्शकको साथ पाउने विश्वास व्यक्त गरेका छन् ।
प्रतिक्रिया दिनुहोस !
