काठमाडौँः १८ दिनदेखि अनशनरत प्रध्यापक डाक्टर गोविन्द केसीको अवस्था जटिल बन्दै गएपछि सरकारले तेस्रो चरणको वार्ताको तयारी गरेको छ । वार्ताका लागि सरकारी पक्षले केसी पक्षबाट बनाइएको वार्ता टोलीलाई शिक्षा मन्त्रालयमा बोलाएको छ ।
पहिलो र दोस्रो चरणको वार्ता बिफल भएपछि सरकारले गृहकार्य गरेर तेस्रो चरणको वार्ताको तयारी गरेको हो । सरकारी वार्ता टोलीका सदस्य डा. गुणराज लोहनीले वार्ता जारी नै रहेको बताएका छन् ।
शिक्षा मन्त्रालयका एक सहसचिवले केसी पक्षको वार्ता टोलीलाई तयारी रहन खबर गरेको स्रोतले बताएको छ । सरकारी वार्ता टोली भने मन्त्रालयमै छलफलमा जुटेको छ ।
यसैबीच जुम्लामा अनशनरत डा. केसीको अवस्था कम्जोर बन्दै गएको उनको उपचारमा संलग्न चिकित्सकहरुले जानकारी दिएका छन् । रगतमा अक्सिजनको मात्रा निरन्तर कम हुँदै गएकाले नियमित अक्सिजन दिइएको छ । मंगलबार बिहान स्याचुरेसन घटेर ७० को हाराहारीमा पुगेपछि अक्सिजनको मात्रा बढाइएको उपचारमा संलग्न डा. पुजन रोकायाले जानकारी दिएका छन् ।
मंगलबारको रगतको जाँचबाट आएको रिपोर्टले केसीको स्वास्थ्य अवस्था झन् खस्किएको देखाएको छ । रगतमा सेतो रक्तकोसिका घट्दै गएको छ भने दुवै हातमा संक्रमण पनि देखिएको छ । ‘आजको रिपोर्ट अनुसार केसीको मुटुको चालमा धेरै गडबडी आएको छ’, रोकायाल भने, ‘यस्तो अवस्थामा जुनसुकै बेला मुटुको धड्कन बन्द हुनसक्छ ।’
प्रतिक्रिया दिनुहोस !
