काठमाडौं : सर्वोच्च अदालतले चलचित्र विकास बोर्डको अध्यक्ष पदबाट निकिता पौडेललाई हटाउने वर्तमान सरकारको निर्णय तत्काल कार्यान्वयन नगर्न अन्तरिम आदेश जारी गरेपछि उनी बुधबारबाट कार्यालय फर्कने भएकी छन् । उनी कार्यालय पुनः फर्कने भए पनि बोर्डका अन्य सदस्यहरूको पदावधि भने असार मसान्तबाट सकिएको छ ।
देउवा सरकारले गरेका सबै राजनीतिक नियुक्ति वर्तमान सरकारले बदर गरेपछि निकिता बोर्डबाट बाहिरिएकी थिइन् । निकिताले आफू प्रक्रियाबाट बोर्डमा अध्यक्ष भएको भन्दै न्यायका लागि सोमबार सर्वोच्च अदालतमा उजुरी दिएकी थिइन् । उनी मंसिर २५ गते शेरबहादुर देउवाको सरकार हुँदा बोर्ड अध्यक्षमा नियुक्त भएकी थिइन् ।
पौडेल पुनः पदबहाली भएकै दिनबाट उनकै कार्यकालमा सुरु गरिएको बक्स अफिस सुरु भएको छ । बक्स अफिस सुरु भएपछि प्रतिक्रिया दिँदै पौडेले भनिन्, ‘दिनरात नभनी विगत सात महिनादेखि अहोरात्र काम गर्ने सबैप्रति आभार । बक्स अफिस कमिटीका संयोजक नरेन्द्र महर्जन, सदस्य प्रदीप उदय, आकाश अधिकारी, कपिल पराजुली, प्रभाकर भट्टराईलगायत सबै सिनेमाघर, चलचित्र निर्माता संघ नेपाल, चलचित्र निर्माता संघ, सम्पूर्ण निर्माता, निर्देशक र यस क्षेत्रसँग सम्बद्ध सबै चलचित्रकर्मीमा विशेष धन्यवाद ।’
प्रतिक्रिया दिनुहोस !
