काठमाडौं : टिन एजर कथा बोकेको नेपाली कथानक चलचित्र ‘टिन एज’ टोली अहिले प्रचार अभियानमा जुटेको छ । साउन २५ गते राजधानी र मोफसलमा एकसाथ रिलिज हुने यस चलचित्रलाई दिनेश पाख्रिनले निर्देशन गरेका हुन् ।
प्रेमकथामा आधारित यस चलचित्रले टिन एजरलाई संस्कार सिकाउने निर्देशक पाख्रिनको भनाइ छ । ‘चलचित्रले नयाँपुस्ताको कथा बोकेको छ । कलाकार नयाँ भए पनि परिपक्व अभिनय गरेका छन्’, निर्देशक पाख्रिनले भने, ‘दर्शकलाई यस चलचित्रले भरपुर मनोरन्जन दिने छ ।’
चलचित्र क्षेत्रमा नृत्य निर्देशकका रुपमा स्थापित पाख्रिनद्धारा निर्देशित यो पहिलो नेपाली चलचित्र हो । यसअघि उनले तामाङ भाषी चलचित्र ‘जाखेवा’ (जेठो छोरा), राई संस्कृतीमा आधारित चलचित्र ‘आँसु’ निर्देशन गरीसकेका छन् । बिरु मगर, चिनिमाया वाइवा निर्माता एवं देबिका खड्का र बुद्धिमान स्याङतान सहनिर्माता रहेको यस चलचित्रमा नरेशवीर सिं, अजय खड्का, प्रतिक्षा खड्का, कृष्ण सिवाकोटी, रेशम फिरीरी, सरोज शाह, एन्जिला खड्गी, सरिता राजोउपाध्याय, माया मगर आदि कलाकारले अभिनय गरेका छन् ।
चलचित्रमा अहिले चल्तीमा रहेका संगीतकार विकाश चौधरीको संगीत, दीक्षा पाख्रिनको नृत्य, राजु किराँतीको द्वन्द्व एवं बासु न्यौपानेको छायांकन रहेको छ । मेहनतका साथ चलचित्र राम्रो बनेकाले दर्शकमाझ पु¥याउन आतुर रहेको निर्देशक पाख्रिनको भनाइ छ । डेढ सयभन्दा बढी चलचित्रमा नृत्य निर्देशन गरिसकेका पाख्रिन पछिल्लो समय निर्माण हुँदै निर्देशनतिर लागेका हुन् । ‘मिस्टर डन’, ‘मेरो प्यारो माइती घर’, ‘लभ इन चाइना बोर्ड’ र ‘रुद्राक्ष’ निर्माण गरीसकेका पाख्रिनले टिन एजमा पनि लगानी गरेका छन् ।
प्रतिक्रिया दिनुहोस !
