राजविराज : प्रथम मेयर कप सप्तरी प्रिमियर लिग क्रिकेट प्रतियोगिताको उपाधि खडक वारियर्सले जितेको छ। राजविराजमा बुधबार सम्पन्न फाइनलमा बर्साइन थन्डर्सलाई चार विकेटले पराजित गर्दै वारियर्सले उपाधि जितेको हो। उपाधि विजेता वारियर्सले एक लाख ५१ हजार रुपैयाँ हात पार्यो। यसैगरी उपविजेता थन्डर्सले ८१ हजार रुपैयाँमा चित्त बुझायो।
प्रतियोगिताको उत्कृष्ट खेलाडी वारियर्सका कप्तान विवेक यादब, उत्कृष्ट बलर बोदे बर्साइनका नन्दन यादव, उत्कृष्ट ब्याट्सम्यान तिलाठी कोइलाडीका मेहबुब आलम घोषित भए। उदयमान खेलाडी तिलाठी कोइलाडीका राहुल मण्डल बने। उनीहरुले नगद १५ हजार पुरस्कार प्राप्त गरे। विजेतालाई राजविराज नगरपालिकाका प्रमुख शम्भुप्रसाद यादवले पुरस्कार प्रदान गरे।
टस हारेर पहिले ब्याटिङ गरेको थन्डर्सले निर्धारित २० ओभरमा आठ विकेट गुमाएर एक सय २७ रन बनायो। थन्डर्सका कप्तान सिद्धान्त लोहनीले ३५ रन बनाए। यस्तै रोहित सिंहले २७, श्रवण यादवले १९, सन्दीप ढुंगानाले १६ रन बनाए। वारियर्सका उपेन्द्र राय, हरिशंकर साह र विवेक यादवले दुईदुई विकेट हात पारे।
एक सय २८ रनको लक्ष्य वारियर्सले १९.१ ओभरमा ६ विकेट गुमाएर भेट्टायो। वारियर्सको जितमा पुष्प थापाले सर्वाधिक ४२ रन बनाए। म्यान अफ द म्याच समेत चुनिएका उनले ३२ बलमा ६ चौका र एक छक्का प्रहार गरे। यस्तै फिर्दोस अन्सारीले अविजित २५ रन बनाए।
प्रतिक्रिया दिनुहोस !
