तीन चलचित्रको भिडन्त : भैरे, पण्डित बाजेको लौरी र चक्करमध्ये कसले मार्ला बाजी ?

काठमाडौं : असार महिनाभर विश्वकप फुटबलका कारण नेपाली सिनेमाको बजार नराम्रोसँग प्रभावित भयो । त्यस क्रममा रिलिज भएका कुनै पनि चलचित्रले सन्तोषजनक व्यापार गर्न सकेनन् । महिनाको अन्तिम शुक्रबार एकैसाथ रिलिज भएका चार चलचित्र जुध्दा सबैलाई घाटा भएको छ ।

मिलन चाम्स निर्देशित बबी, शोभित बस्नेत निर्देशित बाबु कान्छा, राजबहादुर साने निर्देशित वीरांगना र कल्याण अधिकारी निर्देशित यो पागल मन प्रदर्शनमा आएका थिए । एक महिनाको अन्तरालमा रिलिज भएका चलचित्रहरूले आशातीत व्यापार गर्न नसक्दा सिनेमामा लगानी भएको आठ करोड रुपैयाँभन्दा बढी लगानी डुबेको छ ।

फ्राइडे रिलिजअन्तर्गत यो शुक्रबार पनि एकसाथ तीन चलचित्र मैदानमा उत्रन लागेका छन् । सूर्य बोहोराको निर्देशनमा बनेको भैरे, दीपक ओलीको निर्देशनमा बनेको पण्डित बाजेको लौरी र अनुष्क रौनियारको निर्देशन रहेको चक्कर प्रदर्शनमा आउन लागेका हुन् । तीनवटा चलचित्र जुध्दा सबैलाई घाटा हुने निश्चित छ ।

अभिनेता दयाहाङ राईको मुख्य भूमिका रहेको ‘भैरे’मा उनको जोडी अभिनेत्री सुरक्षा पन्तसँग बाँधिएको छ । यस वर्ष रिलिज भएको राईको यो पहिलो फिल्म हो । निर्देशक एभरेस्ट सूर्य बोहराले ‘भैरे’मा फरक किसिमको प्रयास गर्ने कोसिस गरिएको बताए । बिहीबार राजधानीमा पत्रकार भेटघाट गर्देै उनले यो नेपाली माटोकै मौलिक र मनोरञ्जक चलचित्र भएको बताए । उनले भने, ‘कोही यो अग्र्यानिक भन्छन् । कोही कमर्सियल फिल्म भन्छन् । तर, म भने यो शुद्ध नेपाली कथानक फिल्म हो भन्छु । यसले मनोरञ्जन पनि दिन्छ र देशको समस्या पनि बोल्छ ।’

बालकलाकार अनुभव रेग्मीले ‘भैरे’मा आफूहरूले धेरै मेहनत गरेको बताए । उनले छायांकनका बेला टुकुचे पुग्दा आफू बिरामी भएको जानकारी दिए । अभिनेत्री वर्षा सिवाकोटीले फिल्म राम्रो बनेका कारण दर्शकलाई मन पर्नेमा विश्वस्त रहेको बताइन् । सुरक्षा पन्त पनि यो फिल्मले आफूलाई उचाइ दिने बताउँछिन् । कलाकार बुद्धि तामाङले युवाले चाहेको खण्डमा आफ्नै देशमा बसेर पनि केही गर्न सकिन्छ भन्ने सन्देश फिल्मले दिन खोजेको बताए । अभिनेता राईले खिच्नका लागि ठाउँ र मौसमका कारणले गाह्रो भए पनि फिल्ममा त्यसको सही सदुपयोग भएको बताए ।

प्रेमप्रसाद पौडेल र देवीमाया अधिकारी निर्माता रहेको फिल्ममा करुणाकर घिमिरे, सबिता गुरुङ, यम बराल र कुमार बस्नेत सहनिर्माता छन् । पुरुषोत्तम प्रधानले ‘भैरे’को सम्पूर्ण दृश्य खिचेका छन् । नेपालय सिनेमा इन्टरनेसनलद्वारा निर्मित तथा लेखबहादुर पुन कार्यकारी निर्माता रहेको ‘भैरे’को सम्पादन बनिष शाहले गरेका छन् ।

सूर्य थोक्करको द्वन्द्व रहेको यस फिल्ममा विक्रान्त बस्नेत, सुनिल थापा, अनुभव रेग्मी, कञ्चन ठकुरी, अंकित पौडेल, सयाहाङ राई, जान्वी बोहरा, जयनन्द लामा, सूरवीर पण्डित, अर्जुन गुरुङ लगायतका कलाकारको पनि अभिनय छ । चलचित्रमा यम बराल र वसन्त सापकोटाको संगीत तथा स्वर रहेको छ ।

यसैगरी शुक्रबार नै अर्को चलचित्र पण्डित बाजेको लौरी प्रदर्शनमा आउँदैछ । पण्डित बाजेको लौरीमा सन्ध्या केसी लिड रोलमा छिन् । यसमा उनले बादी महिलाको भूमिका निर्वाह गरेकी छन् । फिल्मको सेन्ट्रल क्यारेक्टर नै उनी हुन् । यो फिल्मलाई दीपक ओलीले निर्देशन गरेका हुन् । तल्लो जात भनेर हेपिने बदिनी र समाजमा ठूलो जात भनिने पण्डितबीचको सम्बन्धलाई यो फिल्ममा देखाउन खोजिएको छ । अधृत फिल्मस् प्रालिको ब्यानरमा थमनकुमार भण्डारी (राज) र किशोर खड्काले संयुक्त रूपमा निर्माण गरेको फिल्ममा भोलाराज सापकोटा, प्रवीण खतिवडा, विजय बराल, प्रमोद अग्रहरि, मरिश्का पोखरेल, लोकेन्द्र लेखक, विशाल पहारी, कुलदीप अधिकारी लगायतका कलाकारको अभिनय छ ।

यसैगरी आजै फिल्म ‘चक्कर’ पनि रिलिज हुँदैछ । चलचित्रको ‘बिहानीको किरणसँगै’ बोलको गीत चर्चामा छ । अनुष्क रौनियारले निर्देशन गरेको फिल्मलाई अनुष्कले नै सम्पादन गरेका छन् । नेसनल मिडिया प्रोडक्सन र केटीएम आर्टस्को ब्यानरमा बनेको फिल्म ‘चक्कर’लाई रविन आचार्यले निर्माण तथा छायांकन गरेका छन् । फिल्ममा सेक्स र क्राइमको मि श्रण छ । अभिनेता अर्पण थापाले आफ्नो अनुहारमा ब्यान्डेज लगाएका छन् भने अभिनेत्री ऋचा शर्मा प्रहरी अफिसर्सको भूमिकामा देखिएकी छन् ।

कलाकारद्वय एभोनराज उप्रेती र अर्पणबीच द्वन्द्व छ । यस्तै अभिनेत्रीद्वय सिर्जना सुब्बा र स्मृति पोखरेलको इन्टिमेट दृश्यसमेत जोडिएको छ, जसले फिल्मको कथामाथि केही सस्पेन्स पनि छोड्छ । फिल्ममा संगीत संगम पन्त र पुष्प पलाञ्चोकेको छ ।