फुङलिङ : ताप्लेजुङका स्थानीय तहले आफ्ना नीति तथा कार्यक्रममा पूर्वाधार र कृषि विकासलाई प्राथमिकतामा राखेका छन् । अधिकांश तहले विकास बजेटको ठूलो हिस्सा सडक, भवन र खेलमैदान निर्माणमा लगाउने योजनासहितको बजेट सार्वजनिक गरिरहेका छन् ।
जिल्लाको एक मात्र नगरपालिका फुङलिङले सडक निर्माणमा ५ करोड ८० लाख बजेट विनियोजन गरेको छ । सदरमुकामसमेत रहेको नगरपालिकाले ९० लाख रुपैयाँ बसपार्क निर्माणमा लगानी गरेको छ । भवन निर्माणमा १ करोड ४८ लाख, ढल निकासमा १ करोड १ लाख, खानेपानीमा ७४ लाख, खेलमैदान निर्माणमा ६७ लाख विनियोजन गरिएको नगरपालिकाका प्रवक्ता मोहन न्यौपानेले बताए ।
गाउँपालिकाले भने प्रत्येक वडा कार्यालय र गाउँपालिका जोड्ने सडक निर्माणलाई गौरवकै आयोजनाका रूपमा अगाडि बढाउने भएका छन् । २३ करोडको बजेट ल्याएको मैवाखोलाले पूर्वाधार निर्माणमा ४ करोड ८ लाख विनियोजन गरेको छ । ‘हामी शिशु अवस्थामै छौं’, गाउँपालिकाका प्रमुख प्रशासकीय अधिकृत प्रवीणहाङ योङहाङले भने, ‘त्यसैले हाम्रो ध्यान सडक निर्माण, स्तरोन्नति र गाउँपालिका, वडा कार्यालय भवनजस्ता पूर्वाधारमै छ ।’
भौतिक संरचना राम्रो भए मात्र सेवा प्रवाह गर्न सहज हुने गाउँपालिका अध्यक्ष राजन थत्लुङको ठम्याइ छ । निर्वाहमुखी कृषिलाई निर्यातमुखी बनाई जनताको जीवनस्तर उकास्ने योजनामा ४० लाखका कार्यक्रम सञ्चालन गरिने उनले बताए । ‘प्रत्येक वडामा कम्तीमा १÷१ वटा प्रयोगात्मक कृषक पाठशाला सञ्चालन गरी किसानलाई व्यावसायिक ज्ञान प्रदान गर्ने कार्यक्रम छ’, उनले भने, ‘सुन्तला, कागती, किवीजस्ता फलफूलको व्यावसायिक खेतीका लागि उन्नत जातका बीउ र बिरुवा वितरण गर्ने, अकबरे खुर्सानी खेतीलाई प्रोत्साहन गर्नेजस्ता कार्यक्रम पनि छन् ।’
गाईपालनमा किसानलाई ५० प्रतिशत अनुदान दिने योजना पाथीभरा याङ्वरक गाउँपालिकाको छ । ‘दुग्धजन्य वस्तु उत्पादनका माध्यमबाट रोजगारी सिर्जना गर्दै किसानको आत्मसम्मान बढाई गरिबी न्यूनीकरण गर्दै लैजाने हाम्रो मुख्य लक्ष्य छ’, गाउँपालिका अध्यक्ष केशर मेन्याङ्बोले भने, ‘गाईपालनका लागि ५० प्रतिशत अनुदान र प्रतिगाई ३ हजारका दरले ढुवानी अनुदानको व्यवस्था गरेका छौं ।’
पूर्वाधारअन्तर्गत गौरवका आयोजनाका रूपमा कामीडाँडा–थेचम्बु–चाक्सीबोटे हुँदै चिउरिगोलाई जोड्ने सडकका लागि १ करोड छुट्याइएको छ । मेची राजमार्गसँग गाउँपालिका केन्द्र जोड्ने सीधा सडक स्तरोन्नति गर्ने, गाउँपालिका केन्द्रसम्म सबै वडा सडक सञ्जालले जोड्ने नीति अघि बढाइने र जसको चौडाइ ६ मिटरको बनाउने गाउँपालिकाको योजना छ ।
आठराई त्रिवेणी गाउँपालिकाले पूर्वाधार विकासका लागि गुरुयोजना बनाउने भएको छ । हरेक वडालाई जोड्ने गौरवका सडक निर्माण गरी आठराई त्रिवेणी मार्ग नामकरण गर्ने जनाइएको छ । गाउँपालिकाभित्र जुनसुकै संरचना पनि बालमैत्री, अपांगमैत्री बनाइने गाउँपालिका अध्यक्ष विश्वनाथ सिटौलाले बताए ।
उन्नत जातका गाई, बाख्रा उत्पादन गरी कम लगानीमा बढी आयआर्जन गर्न नश्ल सुधार गर्ने तथा गाउँपालिकालाई एक वर्षभित्रै मासु र अण्डामा आत्मनिर्भर बनाउने योजना छ । पर्यटकीय स्थलको प्रवद्र्धन गरी पर्यटकलाई आकर्षित गर्नेजस्ता कार्यक्रम पनि रहेको प्रमुख प्रशासकीय अधिकृत छविलाल राईको भनाइ छ ।
मेरिङदेन गाउँपालिकाले वडा कार्यालय र स्वास्थ्य चौकी भवन निर्माणलाई यो वर्ष प्राथमिकता दिएको छ । चार वडा कार्यालय, एउटा स्वास्थ्य चौकी र एउटा नमुना विद्यालय निर्माण गर्ने लक्ष्य रहेको गाउँपालिकाका प्रमुख प्रशासकीय अधिकृत भीमकुमार बस्नेतले बताए । तमोर र मैवा नदी किनारमा रहेको दोभान बजारको तटबन्ध निर्माण, गुराँसे पोखरी संरक्षणलगायत प्रत्येक वडालाई केन्द्रसँग जोड्ने नमुना सडक निर्माणका लागि ६ वटै वडामा २५ लाखका दरले विकास बजेट रहेको बस्नेतको भनाइ छ ।
प्रतिक्रिया दिनुहोस !
