तेह्रथुम : तेह्रथुमको म्याङलुङ नगरपालिका-५ जिरिखिम्ती माझगाउँमा निर्माणधीन आम्फुवा पशुहाट बजारस्थलको निर्माण सम्पन्न नभइ अलपत्र परेको छ तर यसको निर्माणकर्ताले रकम भुक्तानी गरेर लगेका छन् ।
दश प्रतिशत जन श्रमदानसमेत कूल एक करोड रुपैयाँ बजेटको यो काममा निर्माण समितिले कागजात मिलाएर आधा पनि काम नगरी भुक्तानी रकम लिएको हो ।
स्थानीय कृषकहरुले पालेका पशुपंक्षी बिक्रीका लागि संकलन गर्न सहज होस भन्ने उद्देश्यले बनाउन सुरु गरिएको पशुहाट बजारको निर्माण समितिले बीचैमा काम छाडेपछि अलपत्र भएको छ । पशुहाट निर्माणका गर्न पशुपंक्षी विकास मन्त्रालयले एक करोड अनुदान दिएको थियो । तर, निर्माणको कार्यको ४० प्रतिशत पनि नसकी निर्माण समितिले अलपत्र पारेर छाडिदिएको छ । अहिले यो कामको भुक्तानीसमेत भएको थाहा पाएपछि गाउँले समेत छक्क परेका छन् ।
पशुहाट निर्माण कार्यमा स्थानीयबासीले सहयोग नगर्दा स्टिमेटअनुसार काम गर्न नसकिएको निर्माण समितिका संयोजक तेजमान कन्दङवा बताए । कृषकहरुकै फाइदाका लागि सरकारले बजेट दिएपनि स्थानीयको अवरोधका कारण आयोजना अलपत्र भएको दाबी गरे । भने,‘हामीलाई गाउँलेले नै सहज ढंगले काम अघि बढाउन दिएनन् ।’ उनले समितिले पुरै काम गरेको दाबी गरे ।
यता स्थानीयबासी तथा वडासदस्य गणेश सोदेम्बाले भने आयोजनामा सरकारबाट प्राप्त भएको अनुदान दुरुपयोग भएकोले निष्पक्ष छानबिन हुनुपर्ने माग गरेका छन् । नेपाल सरकारबाट किसानको नाम आएको एक करोड बजेटबाट करिब ४० प्रतिशत मात्रै काम गरेर पुरै भुक्तानी लिई भ्रष्टचार गरेको वडा सदस्य सोदेम्बाले दाबी गरे । ‘काम पूरा नगरी नै समितिले निर्माण कार्य सम्पन्न भइसकेकोे कागजात बनाएर भुक्तानी लिईकेको छ,’ उनले भने,‘यो भन्दा ठूलो बेथिति के हुन्छ ? हामीले केन्द्रबाट अनुगमन हुनुपर्ने माग गरेपनि सुनुवाइ भएन् ।’
गाउँको विकासका लागि आएको बजेट काम नगरी भुक्तानी लिनु भ्रष्टचार मात्र नभएर अपराध नभएको स्थानीय दिलकुमार सेनेले बताए । भने,‘पशुहाटको नामका आएको सबै पैसा खाएर स्थानीयले सहयोग गरेनन् भन्नु निर्माण समितिको कहाँसम्मको दुस्कार्य हो ।’ पशुहाट निर्माणका लागि स्थानीयबासीले कुनैपनि प्रकारको अवरोध नगरेको वडासदस्य सोदेम्बाले बताए ।
आयोजना स्थलमा अहिले चार वटा ट्रष्ट र एउटा काउण्टरका लागि अपुरो भवन मात्र निर्माण भएको छ । कागजात मिलाएर केन्द्रबाट निरीक्षण गर्नुपर्ने स्थानीयले माग गरेका छन् । दश प्रतिशत जन श्रमदान भनिएको थियो तर काम अलपत्र छ ।
प्रतिक्रिया दिनुहोस !
