तुलसीपुर : दाङको तुलसीपुरमा सुविधासम्पन्न रंगशालाको निर्माण थालिएको छ । आगामी मंसिरमा आयोजना हुने आठौं राष्ट्रिय खेलकुद प्रतियोगितालाई लक्षित गरी तुलसीपुर उपमहानगरपालिका–१७, बेलझुन्डीमा रंगशाला निर्माण थालिएकोे हो । रंगशाला निर्माणका लागि २४ करोड २४ लाख ४५ हजार रुपैयाँ विनियोजन गरिएको छ । १५ बिघा जग्गामा थालिएको रंगशालाको निर्माणको जिम्मा दिवा एमए प्रतिष्ठान कन्स्ट्रक्सन जेभी काठमाडौंले पाएको छ ।
दाङ जिल्ला खेलकुद विकास समितिका अध्यक्ष डिल्लीबहादुर डाँगीले असार ७ गते भएको सम्झौताअनुसार आठ महिनाभित्रै रंगशाला निर्माण गरिसक्ने गरी काम सुरु भएको बताए । आठौं राष्ट्रिय खेलकुदलाई लक्षित गरी निर्माण गर्न थालिएको रंगशालामा एथलेटिक्सका लागि सेन्थेटिक एथलेटिक्स ट्र्याक, फुटबल मैदान, पानी निकासका लागि नाली, भीआईपी प्यारापिट, खेलाडीको चेन्जिङ रुम, बैठक रुम, मिडिया बक्स र साधारण प्यारापिट निर्माण गरिनेछ ।
प्रतिनिधिसभाका सभामुख कृष्णबहादुर महराले बुधबार रंगशालाको शिलान्यास गरे । महराले तुलसीपुर उपमहानगरपालिकालाई नेपालकै पहिलो स्पोर्टस् सिटीका रूपमा विकास गरिने बताए । स्पोर्टस् सिटीका बारेमा राष्ट्रिय खेलकुद परिषद् (राखेप)ले लिएको परिकल्पना रंगशालाले साकार पार्ने धारणा पनि उनले व्यक्त गरे । उनले नेपाललाई खेलकुदको हब बनाउने सम्भावनाको खोजी गरिनुपर्ने बताए ।
कार्यक्रममा युवा तथा खेलकुदमन्त्री जगत्बहादुर विश्वकर्माले खेलकुद सबैको गौरव, स्वास्थ्य र समृद्धिको प्रतीक भएको धारणा व्यक्त गरे । खेललाई पर्यटनको रूपमा विकास गरेर नेपालमा समृद्धि भिœयाउन आवश्यक रहेको उनले बताए । राष्ट्रिय खेलकुद परिषद्का सदस्यसचिव केशवकुमार विष्टले बेलझुन्डीमा निर्माणाधीन रंगशाला सिमेन्ट र रडहरूबाट नभई अत्याधुनिक प्रविधिबाट नट बोल्ट जोडेर निर्माण गरिने बताए । उनले चार महिनाभित्रै रंगशालाको निर्माण सम्पन्न हुने विश्वास पनि व्यक्त गरे । तुलसीपुर, पोखरा र इटहरीलाई स्पोर्टस् सिटीका रूपमा विकास गर्ने लक्ष्य राखेपले लिएको जानकारी पनि उनले दिए ।
प्रतिक्रिया दिनुहोस !
