काठमाडौं : सिर्जनात्मक काममा प्रेरित गर्न मिस लिटिल आइडलको खोजी सुरु भएको छ । विद्यार्थीमा निहित क्षमतालाई उजागर गर्न आठदेखि १३ वर्षका छात्राहरूको खोजी भइरहेको हो ।
प्याब्सन काठमाडौं र एक्सन इन्टरटेनमेन्ट प्रालिको संयुक्त आयोजनामा हुने मिस लिटिल आइडल २०१८ को खोजी सुरु भएको हो । विभिन्न विद्यालयमा अध्ययनरत छात्राहरुमा निहित क्षमता अभिवृद्धिका साथै गुणस्तरीय अध्ययन र सिर्जनात्मक काममा प्रेरित गर्न उक्त प्रतियोगिता आयोजना हुँदै आएको छ ।
प्रतियोगितामा निजी तथा सरकारी विद्यालयमा अध्ययनरत देशभरका आठदेखि १३ वर्ष उमेर समूहका छात्रा सहभागी हुन सक्नेछन् । सन् २००९ देखि वार्षिक रूपमा यो प्रतियोगिता आयोजना गर्दै आएको एक्सन इन्टरटेनमेन्टसँग २०७२ सालदेखि प्याब्सन काठमाडौंले सहकार्य सुरु गरेको हो ।
प्रतियोगिताका शीर्ष उपाधि विजेतालाई नगद पुरस्कार एवं ताजसहित प्याब्सनको संयोजनमा सम्बन्धित विद्यालयसँग समन्वय गरी मासिक शुल्कमा एक वर्षको छात्रवृत्ति, फस्ट रनरअप एवं सकेन्ड रनरअपलाई नगद पुरस्कार र ताजसहित प्याब्सनको संयोजनमा सम्बन्धित विद्यालयसँग समन्वय गरी मासिक शुल्कमा एक वर्षको ५० प्रतिशत छात्रवृत्ति प्रदान गरिने छ ।
प्रतियोगितामा सहभागी विद्यार्थीको व्यक्तित्व विकास, क्षमता अभिवृद्धि, लुकेको प्रतिभा प्रस्फुटन एवं अतिरिक्त क्रियाकलापमा सुधारलगायत धेरै कुरामा प्रभावकारी देखिएकाले मिस लिटिल आइडल प्रतियोगितालाई निरन्तरता दिइएको प्याब्सन काठमाडौंका अध्यक्ष हरिकृष्ण श्रेष्ठले बताए ।
पत्रकार सम्मेलनमा प्याब्सन काठमाडौंकी सहसचिव एवं मिस लिटिल आइडल २०१८ की संयोजक रिता राई (दाहाल) ले प्रतियोगिता उपलब्धीमूलक एवं सहभागीमा सकारात्मक परिवर्तन देखिएको बताइन् ।
‘अहिलेका विद्यार्थी किताबमा मात्र सीमित भएर हुँदैन । कोर्षमा नभएका तर समयअनुसार आवश्यक क्षमता अभिवृद्धिका लागि यस्तो प्रतियोगिता आयोजना गरिएको हो’, संयोजक राईले भनिन् ।
मिस लिटिल आइडल २०१२ की फस्ट रनरअप जोफेन लामाले यस प्रतियोगिताले आफ्नो व्यक्तित्व विकास एवं आत्मविश्वासमा अभिवृद्धि भएकाले आफू यहाँसम्म आइपुगेको अनुभव सुनाइन् ।
प्रतियोगिताको अन्तिम प्रतिस्पर्धा भदौ १६ गते राजधानीमा हुनेछ । मिस लिटिल आइडलको यो नवाै संस्करण हो ।
प्रतिक्रिया दिनुहोस !
