तम्घास : मालिका गाउँपालिका–५ का यमबहादुर विक ७ वर्षदेखि खरको छानामुनि बस्थे । मेलापात नगरी उनलाई बिहान बेलुका छाक टार्न धौधौ पथ्र्यो । घरमा साना छोराछोरी छाडेर पतिपत्नी दुवै मेलापात जानुपर्ने बाध्यता थियो । तर, उनलाई बेलुका घर नफर्कुन्जेल खरको छानो भएको सानो झुपडीमा कतै आगो आगो त सल्केन भन्ने पीर परिरहन्थ्यो । तर अहिले उनको त्यो चिन्ता हराएको छ ।
गाउँपालिकाले जनता आवास कार्यक्रममार्फत उनलाई टिन उपलब्ध गराएपछि उनी अहिले खरको छाना हटाएर हरियो टिनको छानामुनि ढुक्कसाथ बसेका छन्, ‘खर हुँदा सधैं पीर हुन्थ्यो’, विकले भने, ‘गाउँपालिकाले टिन दियो । चिन्ता पनि हरायो ।’ विकका अनुसार घरको लागि आवश्यक जस्तापाता गाउँपालिकाले निःशुल्क दिएपछि खुसी लागेको बताउँदै आफ्नो दुःख देख्ने सरकार आएको सुनाए ।
गाउँपालिकाका प्रवक्ता एवं वडा नं ६ का अध्यक्ष शोभाखर गिरीले गाउँपालिकालाई खरको छानामुक्त बनाउने अभियानअन्तर्गत विपन्न परिवारलाई जस्तापाता उपलब्ध गराएको जानकारी दिए । ‘पैसा हुनेले पहिल्यै टिन लगाएका छन्’, गिरीले भने, ‘विपन्नका लागि जस्तापाता दिएका छौं ।’ उनले पहिलो चरणमा गाउँबाट १ करोड बजेट विनियोजन गरी झण्डै ४ सय ५० घरधुरीले खरका छाना हटाएर जस्तापाता लगाएको जानकारी गराए ।
यस्तै मदाने गाउँपालिकाले पनि गाउँपालिकाभरि रहेका खरका छाना हटाएर जस्तापाता उपलब्ध गराउने कार्यक्रम गरिरहेको छ । पालिकाभर खरका छाना भएका झण्डै पाँच सय घरधुरीका लागि आर्थिक वर्ष ०७४÷७५ मा एक करोड बजेट विनियोजन गरी पहिलो चरणमा अतिविपन्न तीन सय घरधुरीलाई जस्तापाता उपलब्ध गराइएको प्रमुख प्रशासकीय अधिकृत सुरेश भण्डारीले जानकारी दिए । उनले बाँकी परिवारलाई आउँदो वर्ष उपलब्ध गराउने गरी कार्यक्रम बनाएको समेत बताए ।
खरका छानामुनि बसेका विपन्न परिवारलाई धुर्कोट गाउँपालिकाले पनि जस्तापाता उपलब्ध गराएको छ । अझै पनि खरकै छानामा बस्नुपर्ने बाध्यता भएका विपन्न परिवारलाई गाउँपालिकाले जस्तापाता उपलब्ध गराएको गाउँपालिका अध्यक्ष भुपाल पोखरेलले जानकारी दिए । ‘गरिब र विपन्नका लागि स्थानीय सरकार हो’, उनले भने,‘सबै खरका छाना हटाउँछौं, टिन दिन्छौं ।’ पोखरेलका अनुसार गाउँपालिकाभरि पाँच सय घर खरले छाएका छन् ।
आव ०७४÷७५ मा १ करोड ५० लाख बजेट विनियोजन गरी झण्डै चार सय घरधुरीलाई जस्तापाता उपलब्ध गराइएको पोखरेलले जानकारी दिए । आगामी वर्ष खरको छानामुक्त गाउँपालिका घोषणा गर्ने योजना रहेकोसमेत उनले बताए । जिल्लाका इस्मा, मुसीकोटलगायत धेरै स्थानीय तहले खरको छाना विस्थापित गरी विपन्न परिवारलाई जस्तापाता उपलब्ध गराउने कार्यलाई तीव्रता दिएका छन् ।
प्रतिक्रिया दिनुहोस !
