विराटनगर : मोरङको जहदा गाउँपालिका- ७ बाट विद्युत चोरीमा संलग्न आठजना आइतबार राति पक्राउ परेका छन्। प्रहरी र विद्युत प्राधिकरणको संयुक्त टोलीले जहदा- ७ का ३५ वर्षीय विरेन्द्रकुमार खाती, ३५ वर्षीय फागु हस्दा, ६३ वर्षीय जगत हेमरन, ३१ वर्षीय संजयकुमार हेमरन, ४० वर्षीय वर्ष हेमरन, ६० वर्षीय मोहन मरण्डी, ६० वर्षीय दशनाथ मरण्डी र ३३ वर्षीय संजय साहलाई पक्राउ गरेको हो।
प्रदेश- १ प्रहरी कार्यालय विराटनगरले चेकजाँचका क्रममा अवैध रुपमा पोलबाट हुकिङ गरेर विद्युत चोरी गर्दै घरमा प्रयोग गरेको पाइएपछि उनीहरुलाई पक्राउ गरिएको जनाएको छ।
पक्राउ परेकाको साथबाट विद्युत चोरीमा प्रयोग गरिएका तार तथा विद्युतबाट चल्ने विभिन्न सामान जफत गरिएको जानकारी प्रहरीले दिएको छ। उनीहरुलाई विद्युत प्राधिकरणले कारवाहीस्वरुप जरिवाना गरेर छाडेको छ।
प्रतिक्रिया दिनुहोस !
