काठमाडौँ: राजधानीको काँडाघारीमा चिया पसल चलाउँदै आएकी सिन्धुपाल्चोककी चमेली खड्काकी छोरा ११ वर्षीय निशान खड्का आइतवार राति ८ बजे बेपत्ता भए ।
चिया पिउन आएका दुईजना युवाले बालकलाई लगेको खुलेपछि परिवारले प्रहरीलाई राति नौ बजे नै खबर गरे । परिवारले बालक हराएको सूचना पाइसकेपछि उता अपहरणकारी युवाले उनका परिवारसँग फिरौतीको बार्गेनिङ थालिसकेका थिए ।
पसलमा आएर दुई पटक चिया पिएका उनीहरुले बालकलाई उठाएपछि उनकी आमासँग ४० लाख रुपैयाँ फिरौतीबाट बार्गेनिङ सुरु गरेका थिए । राति पटक पटक फोन गरेर उनीहरुले बालककी आमासँग फिरौती बार्गेनिङ गरिरहँदा बालकको पनि ज्यान लिने धम्की दिएका थिए ।
राति दुई पटक फोन गरेर उनीहरुले ४० लाख रुपैयाँबाट सुरु गरेको बार्गेनिङपछि फोन गरेको सिमकार्ड फ्यालेका थिए । फिरौती बार्गेनिङ गर्नका लागि उनीहरुले पहिलो सिम फ्यालेपछि दोस्रो सिमको प्रयोग गरेका थिए ।
बार्गेनिङ गर्दा गर्दै हत्या
त्यसक्रममा उनीहरुले बालकको राति नै हत्या गरेको खुलेको महानगरीय प्रहरी अपराध महाशाखाका प्रमुख एसएसपी धीरजप्रताप सिंहले जानकारी दिए ।
‘आमासँग बार्गेनिङ गर्दा गर्दै बालकको राति नै हत्या भएको खुलेको छ’, उनले भने, ‘राति नै बालकको ज्यान लिएपछि उनलाई ठिमी नगरपालिका वडा नम्बर ७ नगदेशस्थित श्याम लवटको निर्माणाधीन घर बाहिरतर्फको गारोसँगै जोडिएको खाल्डोमा गाडिएको अवस्थामा भेटिएको छ ।’
यस्तो अवस्थामा बालक
घटनास्थलमा अन्नपूर्णकर्मी पुग्दा बालकको मुखमा कपडा कोचिएको थियो । नयाँ बन्दै गरेको श्याम लवटको घर बाहिरको गारोसँगै जोडिएको खाल्डोबाट पुलिसले निकालेको शव हेर्दा उनको राति नै हत्या भएको अनुमान लगाउन सकिन्थ्यो ।
दुवै अपहरणकारीले बालकको हत्या आफ्नै कोठामा गरेपछि त्यहाँबाट निकालेर निर्माणाधीन नयाँ घरको खाल्डोमा पुरिएको भेटिएको हो । खाल्डोमा भेटिएको बालकको खुट्टा सेतो टेपले बाँधिएको थियो ।प्रहरीले कसरी पत्ता लगायो
बालकका परिवारले निशान बेपत्ता भएको खबर गरेपछि काठमाडौँ र भक्तपुरका प्रहरी युनिट एकसाथ एलर्ट भएका थिए । राति नै खबर आएपछि सोमबार बिहानैबाट काठमाडौँ र भक्तपुर परिसरको टोलीले काँडाघारीबाट अनुसन्धान थालेको थियो ।
प्रहरीले अनुसन्धाननका लागि सबैभन्दा सजिलो निशानकी आमालाई फोन गर्न प्रयोग गरिएको मोइबालबाट भयो । अनुसन्धान अघि बढ्दै गर्दा अपहरणकारीले प्रयोग गरेको सिमकार्डको अन्तिम लोकेशन भक्तपुरको ठिमी क्षेत्र देखाएपछि प्रहरीको डेढ सय जना भन्दा बढीको टोली त्यहाँ परिचालित भएको थियो ।
मोबाइल सेवा प्रदायकबाट दुवै सिमकार्डका लोकेशन नगदेश क्षेत्रमा रहेको भेटिएपछि प्रहरीले त्यहीँ अनुसन्धान केन्द्रित गरेको थियो । त्यसक्रममा लवटको निर्माणाधीन घरको भुइँतालको गारोसँगै जोडिएको खाल्डोमा बालकको शव भेटियो ।
प्रतिक्रिया दिनुहोस !
