ललितपुरः ट्रकमा यातनापूर्ण पशु ढुवानी गर्न रोक लगाउन सरकारसहित सरोकारवाला निकायबीच सहमति भएको छ । पशुपक्षी अधिकारवादीले पशुको यातनापूर्ण ढुवानी रोक्न माग गर्दै आएका थिए ।
पशु ढुवानी मापदण्ड २०६४ को प्रभावकारी कार्यान्वयन गर्न माग गर्दै आएको पशु अधिकारका लागि काम गर्ने संस्था स्नेहाज केयरले पशुको यातनापूर्ण ढुवानीको डकुमेन्ट्री नै निर्माण गरी अभियान चलाएको थियो ।
पशु सेवा विभाग, मासु व्यवसायी, प्रहरी, क्वारेन्टाइन अधिकृत, पशु अधिकारकर्मी सहभागी आइतबारको बैठकले पशुको यातनापूर्ण ढुवानीमा रोक लगाउने निर्णय गरेको हो । बैठकमा एक साताभित्रै निर्णय कार्यान्वयन गर्ने प्रतिबद्धतासमेत जनाइएको छ ।
पशु सेवा विभागका महानिर्देशक डा.विमलकुमार निर्मलले पशु कल्याणको विषय अन्तर्राष्ट्रिय मुद्दा भएकाले पशु ढुवानी मापदण्डको कार्यान्वयनमा सरोकारवालाहरू संवेदनशील हुनुपर्ने बताए । उनले भने, ‘आजैबाट राँगाभैंसीको ढुवानीको अनुगमन गरी कारवाहीको दायरामा ल्याइनेछ ।’
नेपाल पशुपक्षीजन्य व्यवसायी संघका अध्यक्ष राजेन्द्र गोपालीले पशु कल्याण कानुनहरूको पालनामा प्रतिबद्ध रहेको बताए । पशु ढुवानी गर्दा नाक र पुच्छरमा बाँध्ने, सवारीसाधनको क्षमताभन्दा बढी ढुवानी गर्नेलाई निरुत्साहित गर्ने प्रतिबद्धता पशु क्वारेन्टाइन अधिकृतहरुले गरे ।
राँगाभैंसीको कष्टपूर्ण ढुवानीको समाचार प्रकाशित भएपछि राँगाभैंसी ढुवानीसम्बन्धमा धेरैले चासो देखाएका थिए । स्नेहाज केयरकी संस्थापक स्नेहा श्रेष्ठले आइतबारको निर्णयलाई सरकारको जितका रूपमा व्याख्या गरिन् । उनले भनिन्, ‘कष्टपूर्ण तरिकाले ढुवानी गरेको भेटिए राँगा गाडीबाट झारीदिने, डोरीले बाँधिएको छ भने डोरी काटिदिनेलगायत बुँदामा सहमति भएको छ ।
पशु अधिकारका पक्षमा लागेकी उनले यो निर्णयले आफ्नो खुसीको सीमा नरहेको प्रतिक्रिया दिएकी छिन् ।काठमाडौं उपत्यकामा मात्र देशभरबाट दैनिक ७ सयदेखि हजारको संख्यामा राँगाभैंसी मासुका लागि भित्रिन्छन् तर ढुवानी भने अत्यन्त यातनापूर्ण छ ।
प्रतिक्रिया दिनुहोस !
