धनकुटा : धनकुटाका स्थानीय तहले आर्थिक वर्ष ०७४/७५ मा ४ करोड ७९ लाख ३४ हजार १ सय ६० रुपैयाँ राजस्व संकलन गरेका छन् । जिल्लाका स्थानीय तहले सम्पत्ति, मालपोत, व्यवसाय, बहाल कर, सिफारिस दस्तुरलगायत शीर्षकबाट राजस्व संकलन गरेका हुन् ।
जिल्लाका ७ स्थानीय तहमध्ये धनकुटा नगरपालिका, चौबिसे र सहिदभूमि गाउँपालिकाले लक्ष्यभन्दा बढी राजस्व संकलन गरेका छन् । महालक्ष्मी, पाख्रिवास नगरपालिका, छथरजोरपाटी र साँगुरीगढी गाउँपालिकाले भने लक्ष्यभन्दा कम राजस्व संकलन गरेका छन् ।
जिल्लाका स्थानीय तहमध्ये धनकुटा नगरपालिकाले सबैभन्दा धेरै र लक्ष्यभन्दा बढी राजस्व संकलन गरेको छ । गत आर्थिक वर्षमा २ करोड २६ लाख रुपैयाँ राजस्व संकलन गर्ने लक्ष्य लिएको सो नगरपालिकाले लक्ष्यभन्दा ३ लाख बढी अर्थात् २ करोड २९ लाख ९ हजार १ सय ४९ रुपैयाँ राजस्व संकलन गरेको राजस्व अधिकृत राजु गुरागाईंले जानकारी दिए । नगरपालिकाले संकलन गरेको कुल राजस्व रकममध्ये सम्पत्ति करबाट २६ प्रतिशत संकलन गरेको थियो । त्यस्तै, व्यवसाय कर, बहाल करलगायत अन्य क्षेत्रबाट पनि राजस्व संकलन भएको उनको भनाइ छ । उनका अनुसार नगरपालिकाले चालु आवमा २ करोड ६० लाख रुपैयाँ राजस्व संकलन गर्ने लक्ष्य राखेको छ ।
त्यस्तै, चौबिसे गाउँपालिकाले पनि गत आवमा लक्ष्यभन्दा दोब्बर राजस्व संकलन गरेको छ । २० लाख रुपैयाँ राजस्व संकलन गर्ने लक्ष्य लिए पनि सो गाउँपालिकाले ५० लाख ५ हजार ८ सय ४० रुपैयाँ राजस्व संकलन गरेको योजना फाँट प्रमुख लीलाबहादुर कार्कीले बताए । उनका अनुसार गाउँपालिकाभित्र उठ्न बाँकी मालपोतको बक्यौता रकम, सम्पत्ति कर, बहाल कर, व्यवसाय, सिफारिसलगायत शीर्षकबाट राजस्व संकलन भएका कारण लक्ष्यभन्दा दोब्बर राजस्व उठेको हो । चालु आवमा ४५ लाख रुपैयाँ राजस्व संकलन गर्ने लक्ष्य रहेको सो गाउँपालिकाले वडा कार्यालयलबाट कर तिर्ने व्यवस्था गरेको छ ।
सहिदभूमि गाउँपालिकाले पनि लक्ष्यभन्दा ११ लाख ६० हजार रुपैयाँ राजस्व संकलन गरेको छ । ३१ लाख ६० हजार राजस्व संकलन गर्ने लक्ष्य लिइए पनि सो गाउँपालिकाले गत आवमा ४३ लाख २० हजार रुपैयाँ राजस्व संकलन गर्न सफल भयो । चालु आवमा ८३ लाख ६० हजार रुपैयाँ राजस्व संकलन गर्ने गाउँपलिकाको लक्ष्य रहेको प्रमुख प्रशासकीय अधिकृत सुवर्ण घिमिरेले बताए । चालु आवको भदौदेखि हरेक वडाबाट कर तिर्ने व्यवस्था सुरु गर्न लागिएको उनले बताए । यस गाउँपालिकाले पनि अन्य स्थानीय तहको जस्तै सम्पत्ति कर, मालपोत कर, व्यवसाय कर, सिफारिस दस्तुरलगायत शीर्षकमा कर संकलन गरेको थियो ।
छथरजोरपाटी गाउँपालिकाले गत आवमा ५० लाख रुपैयाँ राजस्व संकलन गर्ने लक्ष्य लिएको थियो । तर, सो गाउँपालिकाले लक्ष्यभन्दा ७ लाख रुपैयाँ कम अर्थात् ४३ लाख रुपैयाँ संकलन गरेको छ । करको दायरा नबढेको कारण लक्ष्यअनुसार राजस्व संकलन नभएको योजना फाँट प्रमुख तथा सूचना अधिकारी उपेन्द्रबहादुर श्रेष्ठले बताए । सो गाउँपालिकाले चालु आवमा ७५ लाख रुपैयाँ राजस्व संकलन गर्ने लक्ष्य लिएको छ । गाउँपालिकाले गत आवदेखि नै हरेक वडा कार्यालयबाट कर तिर्ने व्यवस्था गरेको उनले बताए ।
६५ लाख रुपैयाँ राजस्व संकलन गर्ने लक्ष्य लिएको महालक्ष्मी नगरपालिकाले गत आवमा ४६ लाख ९९ हजार १ सय ७१ रुपैयाँ मात्रै राजस्व संकलन गर्न सफल भयो । नगरपालिकाले मालपोत, व्यवसाय कर, सिफारिस दस्तुरलगायत शीर्षकबाट कर संकलन गरेको लेखा अधिकृत दुर्गा घिमिरेले बताए । चालु आवमा ६५ लाख रुपैयाँ राजस्व संकलन गर्ने लक्ष्य लिएको छ । सम्पत्ति करबाहेक अन्य सबै शीर्षकको कर वडा कार्यालयबाट तिर्ने व्यवस्था गरिएको लेखा अधिकृत घिमिरेले जानकारी दिए ।
पाख्रिवास नगरपालिकाले पनि गत आवमा ४५ लाख रुपैयाँ राजस्व संकलन गर्ने लक्ष्य लिएको थियो । तर, लक्ष्यभन्दा झन्डै ११ लाख अर्थात् ३४ लाख रुपैयाँ राजस्व संकलन भएको सूचना अधिकारी किरण राईले बताए । नगरपालिकाले चालु आवमा ८० लाख रुपैयाँ राजस्व संकलन गर्ने लक्ष्य लिएको छ । यो नगरपालिकाको करका क्षेत्र मालपोत कर, सिफारिस दस्तुर, बहाल कर, व्यवसाय करलगायत हुन् ।
साँगुरीगढी गाउँपालिकाले ३३ लाख रुपैयाँ राजस्व संकलन गरेको लेखापाल रोशन पोखरेलले बताए । सो तथ्यांक गाउँपालिकाले लक्ष्यभन्दा झन्डै २३ लाख रुपैयाँले कम हो । गत आवमा गाउँपालिकाले ५६ लाख रुपैयाँ राजस्व संकलन गर्ने लक्ष्य लिएको थियो । तर, पुरानै संरचनामा आधार रहेर कर उठाएको कारण लक्ष्यभन्दा कम राजस्व उठेको योजना फाँटका प्रमुख नारायण खनालले बताए । ‘चालु आवमा ६५ लाख राजस्व संकलन गर्ने लक्ष्य लिएका छौं’, उनले भने, ‘यो पटक सम्पत्ति, बहाल कर लगाएपछि आन्तरिक आय बढ्ने अनुमान गरेका छौं ।’
प्रतिक्रिया दिनुहोस !
