विराटनगर: कर बढाएको विरोधमा विराटनगर महानगरपालिकाको मुल गेटमा युवाहरुले बुधबार विहान १० बजे भेला जम्मा हुँदै थिए ।
उनीहरुबीचमा महानगरपालिकाले गरेको कर वृद्धिको चर्चा चलिरहेको थियो । कुनै अध्ययन नगरि महानगरपालिकाले कर बढाएपछि सर्वसाधरणलाई समस्या भएको भन्दै युवाहरु चिन्तित देखिन्थे ।
युवा संघ र वाईसीएल नेपालको अगुवाईमा कर वृद्धिको विरोधमा उत्रने निर्णय गरेका युवाहरु सडक तताएर र भौतिक संरचना तोडफोड गरेर तथा चर्का नारा लगाएर आन्दोलन गर्नुपर्छ भन्ने सोंचमा भने थिएनन् ।
रचनात्मक र सिर्जनात्मक हिसावबाट विरोध गरेर कर बृद्धिको निर्णय फिर्ता गराउने अभियानमा जुटेका युवाहरुले महानगरकै गेटमा रक्तदान कार्यक्रमको आयोजना गरेका छन् ।
युवा संघ नेपाल मोरङका अध्यक्ष नवीन पौडेलका अनुसार महानगरपालिकाले गरेको कर बृद्धिको विरोधमा रक्तदान कार्यक्रमको आयोजना गरिएको हो ।
‘महानगरले एक हजार प्रतिशत सम्म कर बृद्धि गरेको छ । जुन कर आर्थिक अवस्था नाजुक भएकाले तिर्न सक्ने अवस्थाकै छैन,’ उनले भने, ‘त्यसको विरोधमा सडक तताउन आवश्यक देखिएन । त्यही भएर महानगरकै मुल गेटमा रक्तदान कार्यक्रमको आयोजना गरिएको हो ।’
रक्तदान कार्यक्रममा संकलन भएको ३० पिन्ट रगत नेपाल रेडक्रस सोसाइटीलाई बुझाइएको छ । जनताले रगत र पसिना बगाएर मेहनत र परिश्रमले कमाएको सम्पत्तिमा पनि चर्को कर तिर्नु परेपछि त्यसको रचनात्मक विरोध स्वरुप रक्तदान गरिएको पौडेलको भनाइ छ ।
उनले रक्तदानबाट युवाहरु अवैध रुपमा गरिएको कर बृद्धिको विरोधमा रगत बगाउन तयार छन् भन्ने सन्देश पनि दिन खोजिएको बताए । पौडेलले जनताले पाउनै पर्ने र राज्यले प्रदान गर्नै पर्ने अनिवार्य सेवा सुविधामा एक हजार प्रतिशतसम्म कर वृद्धि गरेर जनतामारा निर्णय महानगरले गरेको पनि बताए ।
धनीलाई सहज र गरिवलाई असहज हुने गरी कर बृद्धि गरिएकोमा युवाहरुले विरोध गरिरहेको जानकारी उनले दिए । महानगरले गरेको कर बृद्धि अवैधानिक रहेको पनि उनको भनाइ छ ।
वाईसीएल नेपालका केन्द्रीय सचिवालय सदस्य ईश्वरी आचार्यले कर बृद्धिको विरोधमा महानगरपालिकालाई एउटा ज्ञापन पत्र पनि बुझाइएको बताए । उनले अप्रत्यासित कर वृद्धि फिर्ता गरेर कर समायोजनका सवालमा पुर्नबीचार गर्न माग गर्दै ज्ञापन पत्र बुझाइएको जनाए ।
आचार्यले कर वृद्धि फिर्ता नगरे थप आन्दोलन गर्ने तयारी रहेको जानकारी दिए । कर वृद्धि वैज्ञानिक पनि नरहेको बताउँदै उनले भने, ‘कृषकले दुःख गरेर उत्पादन गरेको तरकारीमा बढी कर लगाइएको छ । मदिरा र सुर्तीजन्य पदार्थमा भने सामान्य कर लिने निर्णय भएको छ ।’ कर वृद्धिको शैलीको विरोध गर्दै त्यसलाई समायोजन गरेर जनपक्षीय बनाउनु पर्ने आफूहरुको माग रहेको आचार्यले बताए ।
प्रतिक्रिया दिनुहोस !
