ओखलढुंगा : खोटाङका तीनवटै विमानस्थल अवरुद्ध हुँदा यात्रुलाई सास्ती भएको छ । दुईवटा विमानस्थलमा कालोपत्रेको काम र एउटामा पहिरोले क्षति पु¥याएपछि खोटाङमा लामो समयदेखि हवाई सेवा अवरुद्ध भएको हो ।
यससँगै सबैभन्दा बढी जिल्ला अस्पताल खोटाङबाट अन्यत्र रिफर गरिएका बिरामी समस्यामा छन् । रिफर गरिएका बिरामीलाई स्थानीयले चर्को मूल्यमा हेलिकोप्टर चार्टर्ड गरी काठमाडौं लैजाने गरेका छन् ।
लामीडाँडा विमानस्थलमा २०७४ साल वैशाखदेखि उडान रोकिएको छ । धावनमार्गमा कालोपत्रेको काम थालेपछि उडान अवरुद्ध भएको हो । नागरिक उड्डययन प्राधिकरणको ६ करोड ७६ लाख लगानीमा कालोपत्रे थालिएको विमानस्थलको काम अहिलेसम्म आधा मात्र सम्पन्न भएको स्टेसन म्यानेजर रमेश श्रेष्ठले बताए । एक वर्षभित्र काम सक्नुपर्नेमा अझै अधुरै छ । विमानस्थल कालोपत्रेको जिम्मा वाईएनएस, एसएपी र सूर्य कन्स्ट्रक्सनले लिएको थियो ।
जिल्लाको दक्षिणी क्षेत्रमा पर्ने थामखर्क विमानस्थलमा उडान अवरुद्ध भएको पनि दुई वर्ष भएको छ । कच्ची अवस्थामै उडान सुरु गरेको १८ वर्षपछि कालोपत्रेको काम सुरु गरिएको विमानस्थल रौता कन्ट्रक्सनले जिम्मा लिएको हो । २०७३ साल माघमा सुरु गरी गत असारसम्ममा सम्पन्न गर्नेगरी सम्झौता गरिए पनि काम अहिले ७५ प्रतिशत मात्र भएको प्राधिकरणका इन्जिनियर रत्न श्रेष्ठले बताए । प्राधिकरणको ९ करोड ३८ लाख लागतमा धावनमार्ग कालोपत्र गर्न सुरु गरिएको थियो ।
मनमाया राई खानीडाँडा विमानस्थल पनि गत जेठदेखि अवरुद्ध छ । जेठ १ गते दिउँसो भारी वर्षापछि पहिरो गएका कारण विमानस्थल अवरुद्ध भएको हो । विमानस्थलको धावनमार्गमुनि बनाइएको ढल थुनिएपछि बाढीले दक्षिणी भाग भत्किएको निर्माण उपभोक्ता समितिका अध्यक्ष दुर्गाप्रसाद घिमिरेले बताए । भने, ‘पहिरो गएपछि मर्मत गर्न सम्बन्धित निकायले ध्यान नदिँदा विमानस्थल अवरुद्ध भएको हो ।’
जिल्लाका ग्रामीण सडकसमेत वर्षायाममा अवरुद्ध हुँदा बिरामीलाई डोको र स्ट्रेचरमा बोकी स्वास्थ्य संस्था पु¥याउनुपर्ने बाध्यता रहेको बराहपोखरी गाउँपालिका–५ का दीपक राईले बताए । विमानस्थल र ग्रामीण सडकका काम सम्पन्न गराउन दबाब दिइएको प्रतिनिधिसभा सदस्य विशाल भट्टराईले बताए ।
प्रतिक्रिया दिनुहोस !
