तेह्रथुम : जिल्लाका ग्रामीण भेगमा अलैंची खेती गर्ने क्रम बढेको छ । किसानले अन्नबाली मास्दै अलंैची खेती विस्तार गर्न थालेका छन् । अन्नबालीबाट राम्रो आम्दानी लिन नसकेका किसानले खेतीयोग्य जमिनमा अलैंची रोप्न थालेका हुन् ।
अलैंचीको भाउ भने बर्सेनि घट्दै आएको छ, चार वर्षअघि अलैंची प्रतिमन १ लाख रुपैयाँभन्दा बढी मूल्यमा बिकेको थियो । भारत निकासीमा समस्या भएसँगै अलैंचीको मूल्यमा गिरावट आएको हो । तर, पाखोबारी, खोलाखोल्सी मात्र होइन, खेतीयोग्य जमिनका साथै करेसाबारीमा पनि किसानले अलैंची रोपेको पाइन्छ । बिक्री मूल्य कमै भए पनि अन्नबालीभन्दा राम्रो आम्दानी हुने भएकाले अलंैची नै रोजिएको लालीगुराँस नगरपालिकाकी लीला लिम्बूले बताइन् । ‘प्रतिमन ३० हजार रुपैयाँ मात्र भए पनि अलंैचीले अन्य खेतीलाई पछि पार्छ’, उनले भनिन् ।
गत वर्ष ४० हजार रुपैयाँ मन अलैंची बिक्री गरेका किसानले यो वर्ष पनि खेती विस्तार गरिरहेका छन् । सेपिलो र पानीको स्रोत भएको जमिनमा राम्रो उत्पादन हुने भएकाले किसानको रोजाइमा अलैंची परेकोे मेन्छ्यायेम गाउँपालिका श्रीजुङका दीपेन चोङबाङले बताए । ‘नगदे बालीमा अरूभन्दा अलैंचीबाट मनग्गे आम्दानी लिन सकिन्छ’, उनले भने ।
अलैंचीबाट लाखौं आम्दानी गर्दै आएका किसानलाई घट्दो मूल्यले निरास बनाए पनि खेती भने विस्तार भइरहेको कृषि विकास कार्यालयले जनाएको छ । यहाँका किसानले अलैंची बिरुवाबाटै पनि लाखौं आम्दानी गरिरहेको जनाइएको छ । किसानले पाँचदेखि ५० रोपनी क्षेत्रफलसम्म नर्सरी लाउँदै आएको फेदाप गाउँपालिकाका गजाधर दुलालले बताए । उनका अनुसार अहिले अलैंची बिरुवा खरिदबिक्री हुन थालेको छ ।
जिल्लाको साबिकका गाविस इवा, ह्वाकु, संक्रान्ति, खाम्लालुङ, सम्दु, इसिबु ओयाक्जुङ, जलजले, सिम्ले, मोराहाङ श्रीजुङ, पौठाक, आङबुङ, जिरीखिम्ती, सोल्मा, सुङनाम फुलेक दाँगपा, बसन्तपुर सुदाप आङदिमलगायत स्थानमा अलैंचीको व्यावसायिक खेती हुँदै आएको छ । जिल्लामा ७ सय २३ हेक्टर क्षेत्रफलमा अलैंचीको खेती भइरहेको कृषि विकास कार्यालयको तथ्यांकमा छ ।
प्रतिक्रिया दिनुहोस !
