वीरगन्ज : पश्चिमा साहित्य र संस्कृति हाबी हुँदै गएका कारण विश्वबजारमा नेपाल र भारतको साहित्य ओझेलमा परेको दुवै देशका साहित्यकारले निष्कर्ष निकालेका छन्।
वीरगन्जमा आइतबार नेपाल भारत सहयोग मञ्चले आयोजना गरेको नेपाल भारत साहित्य महोत्सवमा सहभागी दुवै देशका साहित्यकारले नेपाल र भारतका साहित्यिक रचना र कृति अंग्रेजी भाषामा अनुवाद नगरिएका कारण पश्चिमा साहित्य विश्वबजारमा हाबी भएको र पूर्वीय साहित्य ओझेलमा परेको बताएका हुन्।
नेपाल र भारतका साहित्यिक कृति र रचना विश्व बजारमा पुर्याउन दुवै देशका साहित्यकारले सहकार्य गरेर साझा संघर्ष थाल्नुपर्नेमा उनीहरूले जोड दिए।
महोत्सवमा नेपाल भारत साहित्य यात्रानामक कार्यपत्र प्रस्तुत गर्दै साहित्यकार महेश पौडेलले भने, ‘विश्वको कुल जनसंख्याको २० प्रतिशत जनसंख्या नेपाल र भारतको गरी छ। यी दुई देशमा मात्रै आफ्ना साहित्यिक कृति र रचना पाठकका हातहातमा पुर्याउन सकियो भने पनि हाम्रो साहित्यले विश्वबजारमा पश्चिमा साहित्यलाई गतिलो टक्कर दिन सक्छ।’
नेपालका साहित्यिक कृति भारतमा र भारतका साहित्यक कृति नेपालमा अझै पनि पर्याप्त मात्रामा पुग्न नसकेका कारण पनि पश्चिमा साहित्य यी दुवै मुलुकमा हाबी भएको उनले बताए। अब नेपाल र भारतबीच साहित्यिक पर्यटनको खाँचो रहेको उनले बताए।
महोत्सवमा सहभागी भारत मेरठका वरिष्ठ साहित्यकार विजय पण्डितले दुई देशका साहित्यकारले आपसमा सहकार्य गरेको खण्डमा नेपाल र भारतबीचको शदीयांैदेखिको सम्बन्ध विश्वका लागि एक उदाहरण बन्ने बताए।
दुवै देशका साहित्यिक स्रष्टालाई एकै थलोमा भेला गराउने आफ्नो १० वर्ष पहिलेदेखिको सपना वीरगन्जको महोत्सवले साकार पारिदिएको र यस्ता कार्यक्रमलाई आगामी दिनमा पनि निरन्तरता दिइने बताए। उनले भने, ‘हुन त दुई देशबीच अहिले पनि केही राजनीतिक, आर्थिकलगायतका समस्या छन् तर हामी दुई देशका साहित्यकारले साहित्यमार्फत नै ती समस्या समाप्त पार्न चाहन्छौं।’
भारत हरिद्वारका वरिष्ठ साहित्यकार डाक्टर योगेन्द्रनाथ शर्माले भने, ‘नेपाल भारतबीचको सामाजिक, सांस्कृतिक, साहित्यिक, आर्थिक सम्बन्धलाई वीरगन्जको महोत्सवले पञ्चामृत बनाइदिएको छ।’
नेपालका आख्यानकार ध्रुवचन्द्र गौतमले साहित्यमा मृत अवस्थामा पुगिसकेको भनिएको वीरगन्जको साहित्य, आइतबारको साहित्य महोत्सवले जीवित नै छ भन्ने सन्देश प्रवाह गरेको बताए।
महोत्सवको उद्घाटन समारोहलाई सम्बोधन गर्दै प्रदेश नम्बर २ का मुख्यमन्त्री लालबाबु राउतले नेपाल र भारतका साहित्यकार दुनियाँमा नाम चलेका अरू मुलुकका साहित्यकारभन्दा कम नरहेको बताए।
नेपाल र भारतका साहित्यकार र तीनका कृति संसारमा नाम चलेका साहित्यिक हस्तीभन्दा कम नरहे पनि उनका कृति अंग्रेजी भाषमा अनुवाद नभएका कारण अरू मुलुकमा चर्चित बन्न नसकेको बताए।
महोत्सवमा नेपालका वरिष्ठ आख्यानकार डाक्टर ध्रुवचन्द्र गौतम, रमेश गोर्खाली, श्रेष्ठ प्रिया पत्थरदिल र जशराज किराँती तथा भारतका साहित्यकार योगेन्द्रनाथ शर्मालाई सम्मानित गरिएको छ।
नेपाल भारत सहयोग मञ्चका अध्यक्ष अशोक वैद्यको अध्यक्षतामा भएको महोत्सवमा भारतको दिल्ली, राजस्थान, हरिद्वार, जालान्धर, हरियाणा, बिहार, चेन्नई, मुम्बईका गरी ८० जना भारतीय साहित्यकार तथा नेपालका विभिन्न जिल्लाका गरी एक सय ५० जना नेपाली साहित्यकारको सहभागिता थियो।
प्रतिक्रिया दिनुहोस !
