परासी : नेपाल–भारत सुरक्षाकर्मीको टोलीले पश्चिम नवलपरासीको सीमा क्षेत्रमा संयुक्त सुरक्षा गस्ती थालेका छन् । दुवै देशका सीमा सुरक्षाकर्मीले दुई देशसँग सिमाना जोडिएका दसगजा क्षेत्रमा गस्ती गर्न टोली परिचालन गरिएकोे हो ।
टोलीले सीमा क्षेत्रबाट हुने चोरी निकासी, साना हातहतियार र विस्फोटक पदार्थ ओसारपसार नियन्त्रण, आपराधिक क्रियाकलाप नियन्त्रणलाई प्रमुखतामा राखेर काम गर्ने सशस्त्र प्रहरी बल नेपाल गण हेडक्वार्टर पश्चिम नवलपरासी नं. २६ गणका उपरीक्षक गहार्धन राईले बताए । टोलीले दसगजा क्षेत्र अतिक्रमण कार्यलाई पनि रोक्नेछ ।
टोलीमा दुवै देशका ३० जना सुरक्षाकर्मी परिचालन छन् । जसमा सशस्त्र प्रहरी १३, नेपाल प्रहरी ७ र भारतीय एसएसबी फोर्सका १० जना संलग्न छन् । सीमा क्षेत्र जिल्लाको पाल्हीनन्दन गाउँपालिका–५ को चिमनटोलादेखि सुस्ता गाउँपालिका–५ को सकरदिनसम्म छ । २८ किमि लामो सीमा क्षेत्रमा १३ वटा प्रमुख र ३ वटा सहायक गरी १६ वटा सीमा स्तम्भ (पिलर) छन् ।
संयुक्त टोलीले दसगजा क्षेत्रमा रहेका सीमास्तम्भको समेत सरसफाइ र संरक्षण गर्ने राईले बताए । पछिल्लो पटक दसगजा क्षेत्र मिचेर दुई देशका नागरिकले खेती गर्न थालेको पाइएकाले त्यसलाई हटाएर सरसफाइ गरिने उनले बताए । । ‘दसगजा क्षेत्र दुवै देशको हो, स्थानीयलाई जानकारी नभएर खेती गरेको हुन सक्ने भएकाले दुवै देशका सुरक्षाकर्मी र स्थानीयको समन्वयमा त्यसलाई हटाएर सरसफाइ गरिनेछ’, उपरीक्षक राईले भने ।
सरसफाइसँगै टोलीले दुवै देशका स्थानीयको समन्वयमा दसगजा क्षेत्र बचाऊँ अभियान पनि सञ्चालन गर्ने उनले बताए । संयुक्त गस्तीका कारण दुई देशका नागरिकबीचको सम्बन्धलाई पनि सुमधुर बनाई सीमा क्षेत्रको सुरक्षा व्यवस्था मजबुत बनाउने उपरीक्षक राईले विश्वास व्यक्त गरे ।
दसगजा क्षेत्रमा परिचालन गरिएको टोलीले गुठी प्रसौनीबाट गस्ती सुरु गरेको छ । सीमा क्षेत्रमा गुठी प्रसौनी, हरपुर र सुस्ता गरी तीन स्थानमा सशस्त्र प्रहरीका बीओपी कार्यालय छन् । बीओपीले भारतीय सुरक्षाकर्मीको समन्वयमा जिल्लाभरिको सीमा क्षेत्रमा गस्ती गर्नेछ ।
प्रतिक्रिया दिनुहोस !
