म्याड्रिड : स्पेनलाई विश्वकप र युरोकप फुटबलको उपाधि दिलाउने टोलीका महŒवपूर्ण सदस्य डेभिड सिल्भाले अन्तर्राष्ट्रिय फुटबलबाट सन्न्यास लिएका छन् । इङ्लिस प्रिमियर लिग क्लब म्यानचेस्टर सिटीबाट व्यावसायिक फुटबल खेल्ने ३२ वर्षीय मिडफिल्डर सिल्भा स्पेनले सन् २०१० मा विश्वकपको उपाधि जित्दा टोलीका प्रभावशाली सदस्य थिए ।
स्पेनिस टोलीबाट उनले दुईवटा युरो कप उपाधि पनि जितेका छन् । स्पेनले सन् २००८ र सन् २०१२ को युरो कप जित्दा उनी टोलीका सदस्य थिए । उनले सन् २००६ मा स्पेनको सिनियर राष्ट्रिय टोलीमा ‘डेब्यु’ गरेका थिए । लगातार १२ वर्ष राष्ट्रिय टोलीबाट खेल्ने क्रममा उनले स्पेनका लागि एक सय २५ खेलमा सहभागिता जनाउँदै ३५ गोल गरेका छन् ।
सिल्भाले सोमबार राति सामाजिक सञ्जाल ट्विटरमार्फत आफूले स्पेनिस टोलीबाट सन्न्यास लिएको समाचार सार्वजनिक गरेका हुन् । ‘राष्ट्रिय टोलीबाट सन्न्यासको घोषणा गर्नु मेरो जीवनकै सबैभन्दा कठिन क्षण हो’, उनले ट्विट गरेका छन् । ‘राष्ट्रिय टोलीबाट खेल्न पाउनु हरेक खेलाडीका लागि गौरवको विषय हो । आफूले जीवनको महŒवपूर्ण क्षण बिताएको ठाउँबाट बिदा लिने निर्णय गर्नु कसैका लागि पनि सहज हुँदैन’, उत्कृष्ट प्लेमेकर सिल्भाले भनेका छन् ।
उनले स्पेनबाट उमेरसमूहका थुप्रै प्रतियोगिता पनि खेलेका छन् । उनी सन् २००१ मा सबैभन्दा पहिले स्पेनको यू-१६ टोलीमा सहभागी भएका थिए । त्यसपछि सन् २००३ सम्म यू-१७ टोलीबाट खेलेका सिल्भाले सन् २००५ सम्म यू-१९ टोलीमा बिताएका थिए । यसैगरी यू-२० र यू-२१ हुँदै उनी स्पेनको सिनियर राष्ट्रिय टोलीसम्म पुगेका थिए ।
राष्ट्रिय टोलीबाट खेल्दा आफूलाई सहयोग गर्ने सहकर्मी खेलाडी, प्रशिक्षक, पदाधिकारी र समर्थकहरूप्रति उनले आभार पनि व्यक्त गरेका छन् । स्पेनिस टोलीबाट उनले अन्तिम खेल रुस विश्वकपमा खेलेका थिए । गत विश्वकपको प्रिक्वार्टरफाइनल खेलमा स्पेन आयोजक रुससँग पेनाल्टी सुटआउटमा ४-३ गोलले पराजित हुँदा उनी पनि टोलीमा थिए । राष्ट्रिय टोलीबाट त्यो नै उनको अन्तिम खेल थियो ।
म्यानचेस्टर सिटीबाट आफ्नो व्यावसायिक खेल जीवनलाई भने आगामी दिनमा पनि निरन्तरता दिने उनले बताएका छन् । उनी सन् २०१० देखि म्यानचेस्टर सिटीमा आबद्ध छन् । त्यसअघि उनले स्पेनिस क्लब भ्यालेन्सियाबाट पनि लामो समय व्यावसायिक फुटबल खेलेका थिए ।
यसअघि गत शनिबार चर्चित डिफेन्डर जेरार्ड पिकेले पनि स्पेनिस टोलीबाट सन्न्यासको घोषणा गरेका थिए । लगातार नौ वर्षसम्म स्पेनिस राष्ट्रिय टोलीबाट विभिन्न प्रतियोगिता खेलेका ३१ वर्षीय पिकेले विश्वकपलगत्तै राष्ट्रिय टोलीबाट सन्न्यास लिने चर्चा चले पनि करिब एक महिनापछि आएर मात्र उनले सन्न्यासको घोषणा गरेका हुन् । उनले पनि राष्ट्रिय टोलीबाट गत विश्वकपमा रुसविरुद्घ आफ्नो अन्तिम खेल खेलेका थिए ।
प्रतिक्रिया दिनुहोस !
