जुरिच : विश्व फुटबल महासंघ (फिफा) ले नाइजेरिया र घानाको फुटबललाई अन्तर्राष्ट्रिय प्रतिबन्धमा पर्नबाट जोगिन मंगलबार अन्तिम चेतावनी दिएको छ । सरकारले राष्ट्रिय फुटबल संघमा अनावश्यक हस्तक्षेप गरेका भन्दै फिफाले नाइजेरिया र घानाको सरकारलाई आफ्नो गल्ती सुधार्न अन्तिम चेतावनी दिएको हो । फिफाले नाइजेरियाको सरकारलाई त्यहाँको राष्ट्रिय फुटबल संघको कार्यालय भवन तत्काल निर्वाचित पदाधिकारीलाई हस्तान्तरण गर्न सुझाव दिएको छ ।
निर्वाचित पदाधिकारीलाई फुटबल संघको कार्यालय भवन हस्तान्तरण नगरे आफूहरू नाइजेरियालाई अन्तर्राष्ट्रिय फुटबल खेल्नबाट प्रतिबन्ध लगाउन बाध्य हुने फिफाले जनाएको छ । गत महिना नाइजेरिया फुटबल संघका निर्वाचित अध्यक्ष अमाजु पिन्निक विश्वकपमा सहभागी हुन रुसमा रहँदा एक समूहले आफूहरू आधिकारी भएको दाबीसहित संघको कार्यालय भवन कब्जामा लिएको थियो । उक्त समूहले नाइजेरियाको न्यायालयले आफूलाई कार्यालय भवन प्रयोग गर्न आदेश दिएको बताउँदै आएको छ ।
रुस विश्वकपपछि उक्त समूहले कार्यालय भवन छाडेको बताइए पनि अध्यक्ष पिन्कीले भने आफूलाई अझसम्म काम गर्न नदिइएको दाबी गर्दै आएका छन् । फिफाले प्रतिबन्ध लगाएमा नाइजेरियाले कुनै पनि अन्तर्राष्ट्रिय फुटबल प्रतियोगितामा सहभागिता जनाउन पाउने छैन । नाइजेरियाको महिला यू—२० टोलीले पनि फ्रान्समा जारी विश्वकपमा स्वतन्त्र रूपमा मात्र भाग लिन पाउनेछ ।
फिफाको प्रतिबन्धमा परेमा नाइजेरियाको पुरुष टोलीले सन् २०१९ को अफ्रिकन कप अफ नेसन्सको छनोट खेल पनि खेल्न पाउने छैन । छनोट प्रतियोगिता अर्को महिना सुरु हुँदैछ । यसैगरी फिफाले घानाको सरकारलाई पनि सम्भावित प्रतिबन्धबाट जोगिन अगस्ट २७ तारिखसम्मको समय तोकेको छ । उक्त समयभित्र घानाको न्यायालयले राष्ट्रिय फुटबल संघ विघटन गर्नुपर्ने भनी सुनाएको फैसला नसच्याइए आफूहरू प्रतिबन्ध लगाउन बाध्य हुने फिफाले जनाएको छ ।
प्रतिक्रिया दिनुहोस !
