राजविराज : सप्तरीमा एकै दिन चारजनाको मृत्यु भएको छ । पोखरीमा डुबेर तथा करेण्ट लागेर उनीहरुको ज्यान गएको हो ।
धान कुट्ने मिल चलाउन विद्युतको स्विच जोड्ने क्रममा करेन्ट लागेर महादेवा गाउँपालिका–२ बस्ने ५० वर्षीय कपलेश्वर मण्डलको मंगलबार घटनास्थलमै मृत्यु भएको सप्तरी प्रहरीले जनाएको छ ।
यसैगरी पोखरीमा डुबेर दुईजनाको मृत्यु भएको जिल्ला प्रहरी कार्यालय सप्तरीका डिएसपी भावेश रिमालले जानकारी दिए । हजुरआमासँग पोखरीमा नुहाउने क्रममा बलान बिहुल गाउँपालिका–२ पत्थरा टोलका रन्जितकुमार साहको डुबेर मृत्यु भएको छ ।
स्थानीय खुसिलाल साहको पोखरीमा हजुरआमासँग नुहाइ रहेका श्रीराम साहको चार वर्षीय छोरा रन्जितको डुबेर मृत्यु भएको प्रहरीले जनाएको छ ।
सोमबारदेखि हराइरहेका रुपनी गाउँपालिका–२ का ४० वर्षीय रामउदगार सदाको मृत शरिर स्थानीय सार्वजनिक पोखरीमा फेला परेको छ ।
सोमबार राति मादक पदार्थ पिएर बेपत्ता सदालाई घरपरिवारका सदस्यहरुले खोज्ने क्रममा मंगलबार पोखरीमा डुबेर मृत्यु भएको अवस्थामा फेला पारेका हुन् ।
यस्तै गएराति डाक्नेश्वरी नगरपालिका–८ बस्ने ४५ वर्षीय पल्टु सदा मृत अवस्थामा फेला परेको सप्तरी प्रहरीले जनाएको छ । उनको शव शम्भुनाथ नगरपालिका-७ भगवतपुर बस्ने संदेब सदाको घर पछाडीको पोखरीको डिलमा फेला परेपछि अनुसन्धान कार्य भइरहेको डिएसपी रिमालले बताए ।
प्रतिक्रिया दिनुहोस !
