काठमाडौं : कवि विमल वैद्यको तेस्रो कृति ‘अक्षर सिम्फोनी’ बजारमा आएको छ । मञ्जरी पब्लिकेसनले प्रकाशन गरेको कविता संग्रह बिहीबार लोकार्पण भएको हो ।
कवि एवं नेपाल प्रज्ञा–प्रतिष्ठानका पूर्वकुलपति वैरागी काइँला, प्रतिष्ठानका उपकुलपति डा. विष्णुविभु घिमिरे, नेपाल संगीत तथा नाट्य प्रज्ञा–प्रतिष्ठानका सदस्यसचिव गणेश रसिक, नाटककार अशेष मल्ल, पत्रकार किशोर नेपाल, खोजअनुसन्धाता युद्धप्रसाद वैद्य र कवि मोमिलाले संयुक्त रुपमा कृति लोकार्पण गरे।
कवि काइँलाले विमललाई खाइलाग्दो कविको संज्ञा दिँदै उनका कविता प्रौढ रहेको टिप्पणी गरे । १६–१७ वर्षको उमेरदेखि विमलको लेखनबारे आफू जानकार रहेको कवि मोमिलाको भनाइ थियो । पत्रकार नेपालले विमलका कविता नरम खालका रहेको टिप्पणी गर्दै इलामको प्रकृतिमा लुटुपुटिएको भेटिने बताए ।
२०४० सालदेखि कविता लेख्न थालेका विमलले पत्रकारिता गरेर कविता लेखनमै फर्किएको बताए । काठमाडौंबाट फर्किएर इलाममै बस्दै आएका उनले कविताप्रति जिम्मेवारी बढेको बताए । ‘कविता ठट्टा होइन कि भन्ने लाग्दै छ’, उनले भने ।
प्रतिक्रिया दिनुहोस !
