बुटवल : अख्तियार दुरुपयोग अनुसन्धान आयोगको कार्यालय बुटवलले आर्थिक वर्ष २०७४/७५ मा भ्रष्टचार कारबाहीबाट ४ करोड ८ लाख २९ हजार ५ सय ६३ रुपैया अशुल गरेको छ । त्यस्तै व्यक्तीको नाममा हुन लागेको २५ कठ्ठा १० धुर जग्गा समेत सरकारको नाममा कायम भएको अख्तियार बुटवल कार्यालयका प्रमुख रविलाल पन्थले जानकारी दिए । कपिलबस्तु शिवराज नगरपालिकास्थित बनको २६ करोड मुल्य बराबरको जग्गा अख्तियारको कारबाहीबाट सरकारको नाममा कायम भएको उनले बताए ।
अख्तियार बुटवलले गत आर्थिक वर्षमा ५ वटा रंगहात पक्राउ गरी मुद्दा दायर गरेको थियो । सो क्रममा ६ लाख रुपैया घुस र ६ लाख रुपैया विगोदाबीबाट प्राप्त भएको छ । अख्तियारको बुटवल कार्यालयमा गत आर्थिक वर्षमा ८ सय ५७ वटा उजुरी परेकोमा ४ सय ७२ वटा उजुरी मात्र फस्र्योट भएको छ भने ३ सय ८५ वटा फस्र्योट हुन बाँकी छ । आयोगको बुटवल कार्यालयमा आर्थिक वर्ष २०७०÷७१ देखीका उजुरी फस्र्योट हुन बाँकी छ । ०७०÷७१ का २ वटा उजुरी फस्र्योट हुन अझै बाँकी छ । पछिल्लो आर्थिक वर्ष २०७४÷७५ मा २ सय ३७ वटा र अघिल्ला वर्षका गरी ३ सय ८५ वटा उजुरी फस्र्योट हुन बाँकी छ ।
धेरै उजुरी शिक्षासँग सम्बन्धीत पर्ने गरेका छन् । जस अनुसार गत आर्थिक वर्षमा शिक्षा मन्त्रालय अन्तर्गतका ३ सय २१ वटा उजुरी परेका थिए । शिक्षा अन्तर्गत विद्यालयको भवन बनाउँदा गुणस्तरहिन भएको, छात्रबृत्ती रकममा दुरुपयोग भएको, पाठ्यपुस्तक वितरणमा अनियमितता भएको, विद्यालय कोषको हिनामिना, शिक्षक कर्मचारी नियुक्तीमा अनियमीतता भएको लगायतका उजुरी पर्ने गरेका छन् ।
शिक्षा पछि स्थानिय विकास मन्त्रालय अन्तर्गतका उजुरी पर्ने गरेका छन् । गत आर्थिक वर्षमा स्थानिय अन्तर्गत २ सय १ वटा उजुरी दर्ता भएका थिए । स्थानिय अन्तर्गत उपभोक्ता समिति मार्फत हुने गरेका विकास निर्माणसँग सम्बन्धीत काम गुणस्तरहिन भएको, सामाजिक सुरक्षा भत्तामा अनियमीमितता भएको, आय व्यय पारदर्शी नभएको लगायतका उजुरी अख्तियारमा पर्ने गरेको छ । साविक लुम्बिनी अञ्चलका जिल्ला मध्ये रुपन्देहीबाट सबै भन्दा बढी उजुरी पर्ने गरेको छ ।
अनुसन्धानमा प्रविधिको अभाव
अख्तियार दुरुपयोग अनुसन्धान आयोगको बुटवल कार्यालय स्तरोन्ती भएर कार्यक्षेत्र पनि विस्तार भएको छ । सम्पर्क कार्यालयबाट प्रदेश स्तरिय कार्यालयमा स्तोन्नती भएर दरबन्दी पनि थपिएको छ । जस अनुसार साविकको ३० वटा दरबन्दीबाट ५१ वटा बनाइएको छ । तर साविकको दरबन्दी संख्यामा पनि अहिले कर्मचारी छैनन् । आयोगको बुटवल कार्यालयमा अहिले २६ जना कर्मचारी मात्र रहेका छन् । कर्मचारी अभावबारे केन्द्रमा जाहेर गरेको अख्तियार बुटवलका प्रमुख रबिलाल पन्थले बताए । ‘थप जनशक्ती नआउँदा काम कारबाहीमा असर पर्छ । त्यसैले अपुग भएको जानकारी गराएका छौं ।’ उनले भने ।
यस अघि आयोगको बुटवल कार्यालयमा प्रहरी उपरिक्षक प्रमुख हुने व्यवस्था भएकोमा स्तरोन्नती भएपछि प्रसासन तर्फका नेपाल सरकारका सहसचिव कार्यालय प्रमुख रहने व्यवस्था गरिएको छ । त्यसैगरी २ जना उपसचिव एक जना सिनियर डिभिजन इन्जिनियर, नापि अधिकृत, कम्युटर इन्जिनियर, बरिष्ठ अनुसन्धान सहायक लगायतका दरबन्दी थप गरिएको छ ।
आवश्यक जनशक्ती नहुँदा अघिल्ला वर्ष अख्तियारका काम कारवाहीमा समस्या भएको आयोगको भनाई छ । कार्यालयमा सुराकी परिचालन सँग सम्बन्धी दक्ष जनसक्तीको कमी, अनुसन्धानमा प्रयोग हुने प्रविधिको अभाव, सामान्य तथा गोलमोटल प्रकारका उजुरीको चाँपका लगायतका समस्याहरु आयोगको कार्यालयमा रहेको पन्थले बताए । पछिल्लो समय घुस लिने तरिका बदलिएको र गुणस्तर र प्रमाणमुखी अनुसन्धान गर्न चुनौति देखीएको उनले बताए ।
स्तरोन्नती भएसँगै अख्तियारको बुटवल कार्यालयले यस अघि साविक लुम्बिनी अञ्चलका ६ जिल्ला मात्र हेर्ने गरेको मा अब प्रदेशका १२ वटै जिल्ला हेर्ने छ । बुटवल कार्यालय अन्तर्गत नेपालगञ्जमा सम्पर्क कार्यालय समेत रहेको छ ।
प्रतिक्रिया दिनुहोस !
