मुगु : जिल्लाको उत्तरी क्षेत्रमा पर्ने सोरु गाउँपालिका–६ जिमा गाउँका एक दलित घरका चार बालबालिका आर्थिक अभावका कारण विद्यालय जानबाट वञ्चित हुन पुगेका छन् ।
सोरु गाउँपालिका–६ जिमाका काला लावडको गएको वैशाख २८ गते काम सकेर फर्कंदै गर्दा जिमा गाउँ नजिकको झिरझिरेको भीरबाट खसेर मृत्यु भएको त्यसपछि र परिवारमा कमाएर खुवाउने कोही नभएकाले दलित परिवारका चार बालबालिका विद्यालय जानबाट वञ्चित भएका हुन् । अर्काको काम गरेर घरको गुजारा चलाउँदै आएका यो परिवारको आम्दानीको मुख्य बाटो नै बन्द भएपछि पढ्दै आएका चार सन्तानको पढाइ छुट्न गएको हो ।
आर्थिक अभावका कारण जेठो दाइ रतनलाल लावड पहिले नै विद्यालय छोडेर बाबुसँग अरूको काम जाने गरेका थिए । उक्त दलित घरमा अहिले दाइ र आमाले अर्काको काम गरेर मुस्किलले बिहान बेलुकाको छाक टार्दै आएका छन् । ‘अर्काको काम नगरी खान पुग्दैन, छोराछोरीलाई विद्यालय पठाउन कापी कलम र पोसाक जोहो सकेनन् र विद्यालयबाट उनीहरू वञ्चित भएका हुन् ।’ सोही गाउँपालिका–४ का तिलक शाहीले बताए ।
बाबुको मृत्युपश्चात् आर्थिक अभावकै कारण र तीन दिदीबहिनी र एक दुधेबहिनीका लागि आमा र जेठो दाइले ज्याला मजदुरी गरी ल्याएको अन्नले बिहान बेलुकाको छाक टार्ने गरेका यो परिवारको पुख्र्यौली सम्पत्ति भनेको बस्ने घर र एक हल जग्गा मात्र छ । बाबु हुँदा जसोतासो घर चलेकै थियो । तर अब लावड परिवारलाई घर कसरी धान्ने भन्ने चिन्ता बढेको छिमेकी सुरेन्द्र लावडले बताए ।
जेठो दाइ १५ वर्षीय रतन लावडले आर्थिक अभावकै कारण चार कक्षामा पढदा पढदै विद्यालय छोडेका थिए । बाबु हुँदा कहिलेकाहीँ विद्यालय जाने गरेका ११ वर्षीया उजेला लावड, सात वर्षीया डिल्का लावड अहिले घरको कामका साथै आमा दाइलाई सघाउँदै बहिनीको हेरचाह गरेर दिन बिताउने गर्छन् । ‘छोराछोरीका सँगैका साथी विद्यालय जाँदै गरेको देख्दा आफ्नो मन दुख्छ । तर के गरौं काम नगरी खानै पुग्दैन । विद्यालय कसरी पठाऊँ ? ’ आमा रमता लावडले बताइन् ।
प्रतिक्रिया दिनुहोस !
