लन्डन : पछिल्लो पुस्ताका महान् फुटबलरमध्ये मानिएका क्रिस्टियानो रोनाल्डोले आफूले छोरा क्रिस्टियानो जुनियर पनि फुटबलर बनोस् भन्ने चाहेको बताएका छन् । यद्यपि त्यसका लागि आफूले दबाब भने नदिने रोनाल्डोले स्पष्ट पारेका छन् ।
पोर्चुगिज फुटबलर रोनाल्डोका दुई छोरा र दुई छोरी गरी चार नानी छन्, तीमध्ये जुम्ल्याहासहित तीन नानी सेरोगेसी (अर्काको कोख किनेर) र सबैभन्दा कान्छी छोरी आफ्नी प्रेमिका जर्जिना रोड्रिगेजबाट जन्मिएका हुन् । तीमध्ये जेठो छोरो क्रिस्टियानो जुनियर आठ वर्षको पुगिसकेका छन् । विभिन्न अवसरमा क्रिस्टियानो जुनियरले फुटबलको राम्रो कलासमेत प्रस्तुत गर्ने गरेका छन् । यसै सिजन स्पेनिस क्लब रियल म्याड्रिड छाडेर इटालियन टोली युभेन्टस पुगेका रोनाल्डोले सोही विषयमाथि राखिएको जिज्ञासा मेटाउने क्रममा छोरा क्रिस्टियानो जुनियर फुटबलर बनोस् भन्ने चाहेको स्वीकारेका हुन् ।
‘हो म क्रिस्टियानो जुनियर पनि भविष्यमा फुटबलर नै बनून् भन्ने चाहन्छु’, रोनाल्डोले भनेका छन्, ‘यद्यपि त्यसका लागि म उनीमाथि दबाब दिन भने सक्दिनँ । आफैंले चाहना गरेको अवस्थामा भने उनी भविष्यमा फुटबलर बन्न सक्छन् ।’
रोनाल्डोले आफू पनि बाल्यकालमा क्रिस्टियानो जुनियरजस्तै रहेको र उनको पनि भविष्यमा फुटबलर बन्नसक्ने सम्भावना रहेको पनि स्पष्ट पारेका छन् । ‘क्रिस्टियानो जुनियर साँच्चिकै प्रतिस्पर्धी छन् । उनलाई पराजय मन पर्दैन । उनको र मेरो बाल्यकालको व्यवहार पनि उस्तै छ’, एक इटालियन म्यागजिनलाई दिएको अन्तर्वार्तामा रोनाल्डोले भनेका छन्, ‘उनी भविष्यमा पनि मजस्तै रहने छन् । त्यसैले भविष्यमा फुटबलर बन्ने उनको सम्भवना छ ।’
रोनाल्डोले आफूले छोरा क्रिस्टियानो जुनियरलाई समय पाएसम्म सिकाउने पनि गरेको बताएका छन् । ‘म उनलाई फुटबलको केही नयाँ कुरा सिकाउन चाहन्छु । उनलाई आवश्यक परेका सबै कुरा उपलब्ध गराइदिएको छु । मैले उनलाई सधैं सहयोग र समर्थन गर्दै आइरहेको छु’, रोनाल्डोले भनेका छन्, ‘किनभने म उनी भविष्यमा फुटबलर बनेको हेर्न चाहन्छु, त्यसका लागि उनीसँग क्षमता पनि छ । उनीसँग त्यो इच्छाशक्ति छ । उनीसँग राम्रो शरीर छ । उनी बलसँग छिटो पनि छन् । उनीसँग कला छ । राम्रोसँग बल प्रहार गर्न सक्छन् ।’
प्रतिक्रिया दिनुहोस !
