काठमाडौँ: साहित्यकार नीलम कार्की निहारिकाको 'योगमाया' पुस्तकलाई २०७४ सालको मदन पुरस्कार प्रदान गरिने भएको छ ।
पुरस्कारका लागि छनोटमा परेका आठवटा पुस्तकमध्ये निकारिकाको 'योगमाया' कृतिलाई मदन पुरस्कार प्रदान गरिने निर्णय गरिएको मदन पुरस्कार गुठीले जानकारी दिएको छ ।
त्यसैगरी बाल साहित्यको विकास, विस्तार र प्रवर्धनमा पाँच दशकदेखि सक्रिय शान्तदास मानन्धरलाई वर्ष २०७४ को जगदम्बा-श्री पुरस्कार प्रदान गरिने भएको गुठीका अध्यक्ष कुन्द दीक्षितले जनाएका छन् ।
मदन पुरस्कार गुठीले २०७४ सालको मदन पुरस्कारका लागि आठ पुस्तक छनोट गरेको थियो। समितिले आफूलाई प्राप्त दुई सय ५३ पुस्तकमध्ये आठ पुस्तक छनोट गरेको थियो ।
छनोटमा परेका पुस्तकमा ध्रुवसत्य परियारको ‘कैरन’, सरस्वती प्रतीक्षाको ‘नथिया’, तीर्थ गुरुङको ‘पाठशाला’, यज्ञशको ‘भुइयाँ’, नयनराज पाण्डेको ‘यार’, नीलम कार्की ‘निहारिका’ को ‘योगमाया’, राज माङ्लाकको ‘लिम्बूनी गाउँ’ र मोहन वैद्य ‘किरण’ को ‘हिमाली दर्शन’ थिए ।
छनोटमा परेका आठ पुस्तकमध्ये नीलम कार्की निहारिकाको पुस्तक 'योगमाया'लाई सर्वश्रेष्ठ घोषणा गरी २०७४ सालको मदन पुरस्कार प्रदान गरिने घोषणा गुठीले गरेको हो ।
प्रतिक्रिया दिनुहोस !
